Administradór Postu Administrativu Laga, Domingos Loiola José Pereira, informa, Suku 8 ne'ebé pertense ba Postu Administrativu Laga, Suku 6 iha ona postu saúde ne'ebé besik liu ba komunidade sira hodi hetan tratamentu lalais, maibé komunidade husi Suku-2, hanesan Suku Samalari no Tekinomata, tenke la'o tán kilometru lubuk ida, mak foin to'o iha fasilidade saúde.
"Parte Suku Tekenomata nian ba hotu Postu Laga, populasaun husi Suku Samalari ba fali halo tratamentu iha postu saúde Nunira, maske dook mais pasiensia ba, ne'e difikulta tebes ita nia komunidade", dehan nia iha vila nova Baukau, Tersa (07/02).
Enkuantu komunidade husi Suku-2 refere, infrenta difikuldade ba infraestrutura saúde nian, dezde Timor hetan nia indepedénsia to'o ohin loron.
Maibé populasaun husi Suku Tekinomata sei di'ak, tanba distásia husi Suku ba Postu Saúde Laga besik, enkuantu populasaun husi Suku Samalari, tenke la'o ain ho distánsia dook foin asesu ba postu saúde.
Komunidade balun ne'ebé hetan moras grave labele la'o mesak ba postu saúde, obrigadu tenke hulan husi komunidade seluk, tanba labele asesu transporte, hodi tula pasiente.
"Ha'u nia hakarak, Suku ida tenke iha postu saúde ida, para ita nia komunidade la'o besik, tanba durante ne'e pasiente sira moras tenke la'o de'it liu-liu Suku Samalari nian, tanba karreta laiha, sé moras grave hulan de'it", nia akresenta
Nune’e, husu ba Ministériu Saúde atu tau atensaun ba problema hirak ne'e, atu povu labele la'o tán ho distánsia naruk foin to'o iha postu saúde hodi hetan tratamentu.
"Ami sei reuniaun kordenasaun ho Munisípiu mak hatama planu, atu haruka ba nasionál hodi aprova", nia afirma.
Enkuantu postu saúde ne'ebé iha Suku Atelari, Sagadate, Saelari, Libagua, Nunira, inklui Suku Soba, balun kondisaun aat ona, maibé iha ona planu ba faze reabilitasaun.
"Balun kondisaun aat ona, maibé iha ona prosesu laran atu hadi'a", nia informa
Total Suku iha Postu Administrativu Laga hamutuk 8, hanesan, Suku Atelari, Sagadate, Saelari, Samalari, Libagua, Nunira, Soba, inklui Suku Tekinomata, ne'ebé ho númeru populasaun pur-volta 2022-resin. (*)
