Nia afirma, iha prosesu analiza ba kazu hirak ne'e, MP deteta katak, projetu balun iha kontratu no balun laiha kontratu.
"Projetu 145 ne'e, ami haree no analiza katak, balun iha kontratu, balun laiha kontratu. Balun laiha kontratu ne'e, projetu seidauk halo, laiha kontra, laiha dever ba parte sira, ne'ebé seidauk selu ne'e normál, tanba projetu laiha," dehan Prokuradór Jerál Repúblika (PJR), José da Costa Ximenes, iha Palásiu Prezidensiál Bairro-Pite, Díli, segunda (19/10).
PJR mós dehan, problema mak kontratu laiha, maibé servisu halo, entaun atu selu saida.
"Dehan ba halo ponte iha mota ne'ebá, dudu ses tiha, maibé buat hotu laiha, agora atu halo saida, loos ka lae? Projetu iha ne'ebá halo mós hanesan la halo, agora mai husu fali pagamentu ne'e ba saida nian," dehan nia.
Nia mós subliña, kualker Estadu iha mundu, kumpri nia dever, bainhira iha kontratu, laiha kontratu, di'ak liu lalika selu.
"Oinsá mak Estadu ida bele selu, se laiha kontratu, mezmu projetu ida hamriik iha ne'ebá, laiha kontratu, Estadu laiha obrigasaun atu selu, selae mina ida ne'e, orsida fakar hotu de'it ba projetu sira ne'ebé la'ós laiha kualidade de'it, maibé laiha kontratu. Funsionáriu ida de'it iha kontratu mak ita selu, se laiha kontratu mak ita selu ne'e ba saida nian," PJR hakotu.(*)
