Bainhira jornalista www.tempotimor.com halo reportajen direta via online kona-ba enkontru entre Prezidente Repúblika ho partidu koligasaun foun, seguransa ida mai intervein hodi bandu jornalista atu halo servisu.
"Iha ne'e ha'u mak manda, labele live. Hapus tiha. Ha'u komandante seguransa," dehan membru Polisia Nasionál Timor-Leste (PNTL) ne'e.
Hafoin ne'e, ema ne'ebé konsidera-aan superiór iha Palásiu Prezidensiál ne'e bolu kedas pesoál servisu IT atu pasa revista ba telefone jornalista www.tempotimor.com no kontinua kedas apaga video ne'ebé tuir loloos públiku sira mós bele akompaña hela enkontru importante ne'e.
Daudaun ne'e, partidu koligasaun foun kompostu husi CNRT, PD, KHUNTO, UDT, Frente-Mudansa, no PUDD ne'ebé lideradu direta husu Xanana Gusmão hala'o hela enkontru ho Prezidente Repúblika, Francisco Guterres Lú Olo. (*)