“Señora alzira Ximenes ho realidade ho buat ne'ebé mak onestidade ami deklara katak ami nein koñese ami rasik iha ne'e, ha'u-nia pai sira hela iha ne'e desde iha tinan 1965 e tan to'o ami agora ha'u iha oan na'in-haat ona ami nein koñese se mak naran señora Alzira Ximenes ne'e ida ne'e mak problema, ami lamenta ne'e tanba nia ba uza dokumentu falsu ba bele konvense tribunál hanesan orgaun soberanu ida Estadu nian ne'e halo desizaun hodi mai destroi ami-nia sasán iha ne'e”, dehan Reprezentante Família, João Soares ba jornalista sira liuhusi Konferénsia Imprensa iha Aimutin, sábadu (05/03).

Tanba Família Soares ne'e iha dokumentu ba rai ne'ebé kompletu asina husi Pengadilan Negeri Dili liuhusi Pengacara Mufli SH iha tempu kolinializasaun Indonézia.

Pedidu ezekusaun ne’ebé Rekerente Alzira Ximenes, hatama hamutuk ho dokumentu falsu alteradu ne’ebé husu atu Tribunál Rekursu halo konfirmasaun ba desizaun prosesu númeru 04/PDT.G/1997/PN.DIL, tuir artigu 840 husi C.P.C. Timor-Leste, nune’e bele ezekuta rai ida ho luan 21.000 metru kuadradu ne’ebé iha posse requeridu Carlos Soares hodi entrega ba rekerente Alzira Ximenes.

“Hahalok rekerente Alzira Ximenes nu’udar traisaun ida grave ba Tribunál Rekursu nu’udar orgaun soberanu Estadu RDTL, tanba konsege konvense tribunál ho dokumentu falsu ikus mai obriga TDD hodi ba ezekuta rai ho luan rihun 21.000, ho mákina Estadu hanesan PNTL, Seguransa Sivíl no Obras Publika, utiliza eskavatór ba destroi totalmente rekeridu Carlos Soares, ho nia oan sira nia uma”, afirma nia.

Ba hahalok rekerente Alzira Ximenes hamosu prejuizu material por volta $200.000, ne’ebé mak nia sei selu liuhusi prosesu sivil ne’ebé sei hatama iha tempu badak, nune’e mós prosesu kriminál ne’ebé mak sei ba hatama keixa iha Ministériu Públiku no Polísia Cientifíco Kriminal (PCIC), tanba Alzira Ximenes viola artigu 303 no 1 no artigu 304 no 1 husi kódigu penal, ne’ebé bele hetan kastigu husi tinan 2 to’o 6.

“Iha artigu 417 n° 1 do kódigu civil dehan, ema ne’ebé tanba nia hahalok, viola direita ema seluk nia direitu hodi hamosu prejuizu ba ema ne’e, nia iha obrigasaun hodi indeminiza”, dehan nia.

Ho razaun fundamentu legál sira ne’ebé deklara ona, husu ba Tribunál Rekursu liuhusi rekursu estraordináriu tuir artigu 487 alinea B no C, husi kódigu prosesu sivíl atu revoga ka kansela tiha desizaun TDD ne’ebé konsidera Alzira Ximenes ho nia oan Rodolfo Ximenes, Joaquim Ximenes, Nelson Ximenes, Xisto Ximenes, nu’udar herdeiros, proverbiu.

Tanba iha tempu okupasaun Indonézia iha loron sábadu 16 fulan-agostu tinan 1997 no tranzitu julgadu ona iha loron 28 fulan-agustu 1997 tanba dentru de 14 depois de leitura akordaun iha parte sira ida la hato'o rekursu kontra desizaun ne'e, situasaun ne'ebé iha lian Indonézia dehan keputusan Hakim telah mempunyai kekuatan hukum tetap Inkracht. (*)