Tempotimor (Díli) – Primeiru Ministru, Taur Matan Ruak afirma, Governu Timor-Leste naturalmente lamenta ho prosesu judisariu ba belun di'ak Timor-Leste nian, Witness K no Bernard Coalery ne'ebé la'o hela iha tribunál Austrália.
"Ida ne'e prosesu interna. Prosesu justisa iha sira-nia rai. Ita hanesan Governu naturalmente ita lamenta. Mais, ita la mete iha asuntu ida ne'e," deklara PM Taur Matan Ruak iha Palásiu Prezidensiál Bairru-pite, Kinta (15/08/2019).
Maski nune'e, Xefe Negosiadór Prinsipál Fronteira Marítima Xanana Gusmão, eis Prezidente Ramos Horta no sosiedade sivíl hatudu ona sira nia preokupasun kona-ba justisa ne'ebé hasoru Witness K no Colaery. Tanba Australianu nain rua ne'e, defende soberania Timor-Leste.
"Oras ne'e, na'in rua iha hela prosesu judisiariu. Ita nia lider nasionál hanesan señor Ramos Horta mós preokupa, Maun boot Xanana Gusmão mós preokupa ba kestaun ne'e. Katak, ema na'in rua ne'e Timor-Leste nia belun boot," dehan ativista husi ONG La'o Hamutuk, Celestino Gusmão iha Palásiu Prezidensiál, Kinta (08/08/19) semana liubá.