"Prezidente Repúblika, Francisco Guterres Lú Olo, promulga Dekretu-Lei kona-ba apoiu estraordinárius ba insersaun iha merkadu traballu hodi tulun traballadór sira ne’ebé sai dezempregu tanba impaktu sosiuekonómiku husi implementasaun medida prevensaun no kombate pandemia Covid-19", haktuir liuhusi komunikadu imprensa ne'ebé www.tempotimor.com asesu iha sesta, (27/08)

Implementasaun medida prevensaun no kombate pandemia Covid lori impaktu ba atividade ekonómiku ne’ebé menus, númeru dezempregu aumenta no risku sai ki'ak. Situasaun ne’e hetok iha impaktu boot liután ho inundasaun ne’ebé akontese iha 4 abril 2021. Tanba ne’e Estadu halo aprovasaun ba medida apoiu ba empregu liuhusi Lei númeru 8/2021, 3 maiu.

Liuhusi Programa “trabalho contra remuneração” iha ámbitu “Supporting Flood Response and Recovery Project” ho apoiu finanseiru hamutuk US$1.000.000 (miliaun ida dólares norte-amerikanu) jere husi Programa Nasaun Unidas ba Dezenvolvimentu (PNUD) no ho koordenasaun ho Sekretária Estadu Formasaun Profissionál no Empregu (SEFOPE) sei benefisia traballadór besik 5.000 iha 50 aldeia.

Programa ne’e sei lori impaktu liután liuhusi promove insersaun traballadór sira iha merkadu traballu no insentiva partisipasaun setór privadu hodi fó apoiu finanseirus ba empreza no traballadór sira.

Dekretu-Lei fó dalan ba Governu atu fó apoiu ba empregu liuhusi pagamentu ba empreza to’o 70 % husi kustu remunerasaun ba nia traballadór sira, livre husi dever atu selu kontribuisaun ba seguransa sosiál no pagamentu ba súbsidiu estraordináriu dezempregu no promove manuntensaun postu traballu, kontratasaun traballadór no hala’o hikas filafali atividade ekonómika.

Apoiu finanseiru ba empregu sei selu ba fulan tolu nian husi marsu to’o maiu tinan 2021 ba traballadór sira ne’ebé integra iha programa “trabalho contra remuneração”. (*)