Iha abertura asembleia dahuluk CCM nian ne'e, Sekretáriu Estadu Kooperativa (SEKoop), Elizário Ferreira husu ba dirijente no membru sira atu hari'i kooperativa labele 'kahur' ho polítika, tanba bainhira mosu politizasaun, kooperativa bele mate.
Elizário haktuir, esperiénsia kooperativa ne'ebé nia iha, la'os ba SEKoop mak foin aprende, maibé antes tinan 20 aprende ona kooperativa iha Federasaun Hanai Malu (FHM).
Tanba ne'e nia husu ba estrutura sira iha CCM labele polítiza kooperativa.
"Kuandu ó polítiza kooperativa, kooperativa sei mate, sei la moris. Atu hari'i kooperativa, labele hateke ba ita-nia aan rasik, kooperativa sei la moris", dehan SEKOOP, Elizário Ferreira durante diskursu iha Federasaun Hanai Malu (FHM) iha Lanud, Bairru-Pité, kuarta (17/02).
Nia hatutan, kooperativa iha ninia prinsípiu rasik atu estrutura sira bele la'o tuir hodi atinje objetivu no vizaun nune'e bele iha sustentabilidade ba futuru.
Nia esplika, prinsípiu hitu husi kooperativa mak hanesan, adezaun voluntáriu, demokrásia, autu-jestaun, partisipasaun ekonómiku, edukasaun formasaun ho informasaun, interkooperasaun, ikus maka interese komunidade nian ba iha kooperativa ne'e rasik.
"Tanba ida-ne'e maka ohin ha'u dehan katak, atu hari'i kooperativa, labele hateke ba aan-rasik. Sé hateke ba aan rasik, imi sira tuur ne'e sei fahe malu. Tanba kuandu ita hanoin ona ita-nia aan, ema seluk ita sei la hanoin. Entaun, prinsípiu dahitu ne'e, ita sei la haree", nia fó hanoin.
Eis Deputadu Lejizlatura dahuluk ne'e hatutan, iha kooperativa, laiha diskriminasaun entre rasa, kór polítiku, relijiaun ho seluk tan, tanba ne'e maka labele politiza kooperativa.
Komisaun Instaladora husi Cooperativa Camponezes Maubere (CCM), Almerindo Oliveira da Silva, hateten inisiativa ne'ebé sira hamri'ik durante fulan ida ho balu ona, tinan naruk sira sai hanesan produtór.
Tanba ne'e, nia dehan, sira ne'ebé dadaun tuur iha CCM, maiória produtor puru no kamponezes puru, kaer duni ho liman, la'os ko'alia de'it, tanba kada ema ida, sira iha produtu rasik.
"Ne'ebé atu hatete katak CCM ne'e pratisionáriu, la'os politisionáriu. Entaun, ami-nia hakarak kooperativa tenke hamri'ik ho ain-rasik, la'os ema fó osan mak foin la'o, kuandu osan la mai hotu ona", nia afirma.
Entretantu, kooperativa CCM foin eziste iha tinan 2021 ne'e kompleta fulan ida ho totál membru hamutuk 48, defaktu sira halo ona servisu iha baze, maibé dejuri, foin realiza asembleia.
Partisipante iha asembleia CCM n'ee mak, Sekretáriu Estadu Kooperativa (SEKOOP), Elizário Ferreira, Vise Ministru Turizmu, Komérsiu no Industria (VMTKI), Domingos Lopes Antunes no reprezentante Ministru Agrikultura no Peskas (MAP), Diretór Nasional Agró-Komérsiu, inklui membru sira CCM nian tomak.(*)
