Tuir Komunikadu ne'ebé www.tempotimor.com asesu katak, vizitasaun ne'e iha ofisiál dahuluk ba rai li'ur, atu hametin liután relasaun bilateral no kooperasaun ho Austrália hanesan ho nasaun viziñu, iha objetivu seluk husi vizita ne’e nian mós atu agradese ba Governu no povu Australianu sira-nia apoiu no jenerozidade ba Governu Timor-Leste durante mandatu VIII Governu Konstitusionál nian, liuliu iha situasaun COVID-19, hodi apoiu vasina no espesialista sira mai Timor-Leste, no inklui mós apoiu ba kalamidade ne’ebé akontese iha tinan 2020 no 2021.
Durante estadia iha Austrália, Xefe Governu Timoroan sei hasoru malu ho nia omólogu Australianu, Anthony Albanese, sei halo enkontru kortezia ho Governadór Jerál, David Hurley, no ho personalidade importante sira seluk.
Vizita Xefe Governu nian ne’e loloos hala’o iha fulan-fevereiru tinan 2022, maibé tanba Primeiru Ministru pozitivu tiha COVID-19, nune’e adia tiha vizita no foin bele realiza fali.
Iha vizita ne’e, Xefe Governu sei hetan akompañamentu hosi Ministra Negósius Estranjeirus no Kooperasaun, Adaljiza Magno.
Primeiru Ministru, Taur Matan Ruak ho delegasaun sei to’o fali rai laran iha loron 10 fulan-fevereiru, tinan 2023. (*)