"Subsídiu familiar US$200 iha Munisípiu Baukau barak la simu, liu liu Suku Buruma, ninia fukun barak liu mai husi Xefe suku, ema xefe aldeia ba Rekolla ona dadus atu hatama, maibé nia hatama fali ba Gaveta, sira nia la iha fatin", dehan nia iha Parlamentu Nasionál, tersa (17/01).

Tuir nia, dalaruma xefe sira halo tiha atividade seluk no lakohi tau importánsia ba komunidade sira iha suku laran.

"Nia mai tiha Dili ka ba tiha ne'ebé buka sira la hetan, tanba ne'e mak akontese iha Buruma, tanba komunidade barak la hetan US$200 ne'e iha suku Buruma, ema hatama hotu tiha fixa família, maibé ikus la simu ne'e fukun iha fali Xefe Suku", nia afirma.

Deputada levanta asuntu ne’e iha Parlamentu Nasional, tanba hetan informasaun husi komunidade, no nia parte kontaktu kedas ba Xefe Suku, maibé la atende.

Nia dehan, konstrusaun ba Uma Kbiit Laek iha Suku Buruma to'o agora etapa dahuluk de’it mós seidauk finaliza.

Alende ne’e, Xefe Suku Fatulia, Angelinho Moisés Pereira, relata, kona-ba lista benefisiuariu subsidiu fim do anu, iha Suku Fatulia, Postu Administrativu Venilale, Munisípiu Baukau.

Tanba, benefisiáriu hamutuk 71, maibé xefe família 44 naran dupla iha lista, no Xefe família 5 naran laiha lista benefisiariu subsidiu US$200.

"Sira 44 mak la simu, tanba naran dupla signiafika sira nia naran iha fatin seluk mós iha, maibé na'in-5 ne'e halo ona reklamasaun, tanba iha primeiru faze covid nian sira simu, mai fali naran laiha", dehan nia iha resintu administrasaun Baukau, Tersa (17/01).

Tanba ne'e, Autoridade lokál rekolla ona dokumentus husi Xefe família na'in-5, hanesan kartaun eleitóral no fixa família hodi submete ba parte relevante atu rejolve.

Suku Fatulia iha Xefe família hamutuk na'in-5 mak deklara aan lakohi simu subsidiu US$200, tanba saláriu kada fulan liu US$500.

"Na'in-3 doútora, ida eis-deputadu, ho tán ida seluk servisu iha SERVE, I.P, saláriu mais US$500", nia informa

Nia konsidera subsidiu ne’e ajuda tebes povu kbi'it la'ek, tanba bele utiliza subsidiu refere, hodi festeza festa natal no tinan foun hamutuk ho família sira, maibé triste, tanba Xefe família hamutuk na'in-5 la bele hetan direitu ba subsidiu US$200 iha fim do anu.

"Ami rekomenda ba parte relevante atu responsabilidade ba na'in-5 ne'ebé seidauk hetan US$200 ne'e", nia husu

Entretantu, Suku Fatulia iha Aldeia-4, hanesan Bahadato, Uaitobonu, Uatuliana inklui Ossowake, ho nia totál populasaun hamutuk rihun 2903, husi Xefe família 701. (*)