Tuir komunikadu imprensa ne'ebé fo sai husi Gabinete Prezidente Repúblika katak, hahán sira ne'ebe apoiu ba família vulneravél maka hanesan fós saka 50, mina kaixa 50 no supermi kaixa 50.

Sasan hirak ne'e, prezidensia repúblika liuhusi Sekretariu Ezekutivu Xefe Kaza Sivíl, Filomeno Lay ne'ebé distribui ona ba benefisiáriu sira hela fatin iha loron sesta (15/12).

Hahán sira ne'e sai nu’udar prezente boot ida husi Prezidensia Repúblika ba komunidade sira iha loron Natál.

Nune’e, komunidade Vulneravél iha Aldeia Dasilelo, Suku Tulataqeu, Olga Paula da Costa sente kontente no agradese, tanba simu ona apoiu balun husi Prezidente Repúblika, José Ramos-Horta.

"Ami agradese tebes ba Prezidente, Avó Ramos, tanba bele apoia nesesidade bázika ba ami kbi’it laek sira iha área rurais, maske kondisaaun estrada ne'ebe la di’ak, apoiu hirak ne'e bele to'o mai ami-nia uma, iha fatin ida ne'e", nia afirma.

Antes ne’e, Prezidénsia Repúblika mós apoia ona, família vulnerável hamutuk 200 iha Munisípiu Manatutu no tuir planu ba oin, sei distribui tán ba populasaun iha Munisípiu sira seluk. (*)