Tuir informasaun ne’ebé www.tempotimor.com, asesu iha pájina MOP, kinta (28/07) katak, Business Incubation and Innovation of Timor-Leste ne’e hanesan polítika no programa Oitavo Guvernu Konstitusionál ne’ebé mak atu apoiu empreza foinsa’e, M-PMEs atu halo negósiu ho di’ak hodi krese.
Hanesan mós estensaun ida husi sentru dezenvolvimentu emprezariál tuir (Planu Estratejiku Dezenvolvimentu 2011-2022, pájina 111).
Business Incubation Center ne’e hanesan prosesu Dezenvolvimentu ekonomia no empreendimentu ida.
Inagurasaun sentru ne’e Governu ho parseiru sira dezeña atu apoiu negósiu sira ho kuidadu husi kriasaun ideia negósiu to’o hari’i empreza foun ida, no hadi’a negósiu sira ne’ebé la’o ladun di’ak, liuhusi programa apoiu negósiu ida komprensivu.
Programa ne’e hanesan implementasaun reforma husi Governu nian no desizaun estratéjiku ne’ebé mak sei kontribui ba kresimentu ekonomiku.
Eskema ne’e sei radikalmente transforma ekosistema “star-up” nian iha nasaun liuhusi fornesimentu plataforma ida forte ba “start-ups” atu krese no expanda sira-nia negósiu liuhusi programa inovativu oferese ba M-PMEs.
Fasilidade no programa sira ne’ebé mak oferese iha business incubation center ne’e iha área networking, sentru abilidade, business design no laboratóriu esperimentasaun, kitchen lab, konferénsia no enkontru, technology lab no mechanical lab.
Programa sira hanesan business internship, kompetisaun negósiu inovativu, angel investór and/business networking and product pitching, MSMEs tailored-made mentorship no formasaun, esperimentasaun produtu atu apoiu inovasaun, asesu ba finansas no seed funds, formasaun literasia finanseira, ideia negósiu ka startups planning and development, seimináriu no workshop emprezariál regular no sira seluk.
Iha serímonia ingurasaun ne'e partisipa husi Bernadino de Menezes (DN-ADMPME), Fernando Lobato (DNCI) Inspetór Jerál AIFAESA, Diretór Nasionál Regulasaun Komersiál, Bertineti Lobo, Diretór Nasionál Industria Manufatureira, Cláudio Conceição, Diretór Nasionál IADE, Aurito Rodrigues, Reprezentante husi BNCTL, Reprezentante husi JICA, no konvidadus sira hotu ne'ebé mak marka prezensa iha Serímonia inagurasaun sentru inkubasaun refere. (*)