“Ha’u konvida ita-boot sira bele ba haree, obrsa iha ne’eba (iha Bekussi) la’o tiha ona, preparasaun ba ponte temporáriu ne’e ninia ri’in rua ne’e prepara hela, e oituan tan sira sei ba muda ponte besi ida iha fronteira monta mai iha ne’e”, deklara Ministru Obras Públikas, Abel iha pájina MOP, ne’ebé www.tempotimor.com asesu sesta (15/07).

Tanba prosesu sira ne’e atubele rezolve ponte Bekussi ne’ebé durante tinan hira nia laran fó impaktu ba komunidade sira ne’ebé hela besik Ponte refere iha tempu udan.

“Depois ida-ne’e ita bele rezolve ona ponte Bekussi nia prosesu ne’e kuaze 50% ona, ne’ebé oituan tan ita rezolve ida-ne’e”, afirma nia.

Preparasaun ba konstrusaun ponte própriu iha Bekussi daudauk ne’e atinje ona 50%, tanba ne’e, sei lori tempu oituan. Atu labele sakrifika tan komunidade iha área Taibessi ba sofre inundasaun.

Ho ida-ne’e Ministru Obras Públikas hamutuk ho tékniku sira deside sobu ponte besi iha fronteira Mota Masi, munisípiu Kovalima nian, monta provizóriu iha Bekussi hodi sobu ponte tuan antes konstrusaun ba ponte permanente.

Ponte Bekussi ne’e sobu bazeia ba orientasaun husi Primeiru Ministru Jenerál, Taur Matan Ruak, nian iha tinan 2021 hafoin kalamidade 04 Abril tanba ponte refere mak sai kauza ba inundasaun iha área Bekussi nian. (*)