Tuir informasaun ne’ebé www.tempotimor.com asesu iha pájina MTKI, sesta (24/06) katak, Ministru Miguel Carvalho, iha inaugurasaun hatete, uma rua ne'ebé mak inaugura ne'e konstrui husi Programa Nasional Dezenvolvimentu Suku (PNDS) iha tinan 2021, parte husi totál uma ne'ebé konstrui ona iha teritóriu laran tomak hamutuk 1.252 ne'ebé konstrui husi Governu Konstitusionál daualu halo iha tinan kotuk.
Konstrusaun ba UKL barak mak konkluidu ona iha área ruráls hanesan iha Suku 2 iha Postu Administrativu Lolotoe nomós iha área rurál sira seluk infelismente presiza tempu atu konklui hotu.
“Ha’u kontente tebes bele inaugura uma rua hanesan simbolikamente ba família ne'ebé kbi'it laek duni no antigamente hela iha uma ida iha tempu pasadu ladi’ak. Tanba ne'e mak sira iha oportunidade atubele hetan uma ida-ne'e no benefisiáriu sira mós kontente tebes bainhira hetan uma ida-ne'e”, dehan Ministru Miguel Carvalho.
Maibé iha benefisiáriu ida iha Suku Lontas mak sei vulnerável nafatin tanba lakon inan iha tempu konstruksaun Uma Kbi'it Laek ne'e no agora nia oan sira mak sei simu uma ne'e hodi hela, tanba Governu hatur ba povu sira hodi bele tur iha fatin ida dignu no inaugurasaun ne’e bele hanoin ona katak ida-ne'e bele akontese duni.
Partisipa iha Inaugurasaun mak Prezidente Autoridade Munisípiu Bobonaro, Diretór Jerál Administrasaun Finansas, representante Sekretáriu Ezekutivu PNDS, Diretór PNDS Munisípiu Bobonaro no Ekipa, Komandante PNTL eskuadra Postu Lolotoe, Administrador Postu Administrativu Lolotoe, Lideransa Komunitária no Komunidade sira iha Suku rua. (*)