“Sira (kompaña) tenke mai ko'alia ho Governu, oinsá Governu fasilita, tanba iha Ministériu ho Sekretária Estadu bele fasilita ida ne'e maske kompaña sira kontaktu malu, mais hanesan Governu tenke haree ida ne'e halo didi’ak hodi asegura prosesu ida ne'e”, dehan Ministru José Luís do Carmo ba jornalista sira iha Palásiu Governu, kuarta (16/03).
Tanba antes ne’e, Kompaña Grupu Incanto halo ona rekrutamentu ba Timroan kuaze 2000, atu prepara dokumentu hodi ba servisu iha Qatar, maske iha ona kontaktu informa ba Governu, maibé presiza bolu kompaña ne’ebé responsabiliza hodi halo rekrutamentu.
“Atu dehan de'it katak informasaun kona-ba Qatar ne'e joven sira atu ba ne'e, ida ne'e rezultadu husi Expo Dubai informasaun ne'e ba maluk interresadu sira, kompaña boot ida hetan informasaun ne'e husi ita-nia pavillaun, tanba ne'e sira kontaktu mai ona, informal mai ona, e agora saida mak Governu halo mak presiza bolu kompaña ne'ebé kontaktu ona ho sira iha Dubai ne'e, atu haree fasilita no asegura”, hatete nia.
Dadaun ne'e Ministériu Turizmu Komérsiu no Industria mós hein hela kompaña Nasionál ne'ebé mak sei fasilita traballadór Timoroan 2000 ne’ebé aprezenta ona dokumentu ba servisu iha Qatar.
“Agora saida mak Governo halo?. Presiza bolu kompaña ne'ebé de'it iha kontaktu ho kompaña sira iha Dubai ne'e, atu haree no fasilita ida ne'e asegura ida ne'e, ida ne'e iha hela faze ne'ebé Governu hein hela ida ne'e, ko'alia ho governu atu fasilita”, deklara nia.
Tanba antes kompaña haruka traballadór ida ba rai li'ur tenke iha koordenasaun di'ak ho Governu atu nune'e asegura traballadór sira iha ema nia rain. (*)