“Loos duni oras ne'e sasán folin sa'e, ami iha semana kotuk ko'alia ona iha Konsellu Ministru, husu ba Ministériu Turizmu, Komérsiu no Indústria, orienta AIFAESA (Autoridade Inspesaun no Fiskalizasaun Atividade Ekonómika, Sanitária no Alimentar) nomós MKAE, haree oinsá mak kontrola sasán folin ne'ebé sa'e”, dehan nia iha plenária Parlamentu Nasionál (PN), tersa (01/02).
Ho folin sasán sira ne'ebé aumenta iha rai laran, ninia kauza la'ós iha ne'e, maibé tanba importasaun sasán sira ne'ebé tama mai mak dala ruma folin sa'e ona, entaun sira mós fó folin tuir saida mak sira importa mai.
Ba situasaun ne'e la'ós akontese de'it iha Timor-Leste maibé mós nasaun sira seluk dala ruma hasoru situasaun ne'e. Tanba ho situasaun pandemia globál Covid-19 ne'ebé afeta iha mundu, ida ne'e mak afeta ba sasán folin sa’e liliu mina.
“Mina sa'e iha mundu, iha Timor mós mina sa'e tanba ita laiha subsídiu ba mina”, dehan nia.
Ba situasaun hirak ne'e, Konsellu Ministru haruka ona ministériu tuteladu sira atubele haree kestaun refere nomos fó orientasaun ba AIFAESA atubele kontrola nafatin sasan sira ne'ebé mak dala ruma expair maibé kontinua fa’an. (*)