Tuir informasaun ne’ebé www.tempotimor.com, asesu iha pájina Média UNTL, kinta (31/08/2023) katak, Dekanu FEAH, Teodoro Soares, agradese ba Embaxadór Brazil iha Timor-Leste no Leitorado Brazileiru sira, tanba bele inisia kursu ne’e, kursu ne’e importante tebes la’ós ba de’it alunu maibé ba mós profesór sira.
“Ha’u husu ba Leitoradu sira iha prósimu kursu atubele envolve mós profesór sira no kria programa, tanba eskrita sientífika la’ós ba de’it alunu sira, maibé ba profesór atu bele utiliza iha língua portugeza hodi promove liuhusi hakerek sientífiku’’, dehan Dekanu.
Iha fatin hanesan, Embaxadór Brazil iha Timor Leste, Mauricio Medeiros de Assis hatete, kursu kona-ba metodolojia sientífika hanesan produtu servisu husi leitoradu ne’ebé ho produsaun akadémika no alunu sira mak benefisiáriu husi kooperasaun ne’e.
“Kooperasaun Brazileira iha Timor-Leste iha ona tinan haat (4) no setór edukasaun mak sempre prioridade no sempre importante ba governu no timorense no hanesan asaun leitoradu nian atubele reforsa setór edukasaun iha UNTL’’, dehan Embaxadór Brazil,
Tuir Diretora Departamento de Língua Portuguesa, Eugénia de Jesus das Neves, sente kontente tebes ho atividade parseria ho institutu ho departamentu hodi dezenvolve kapasidade alunu sira-nian.
“Aleinde ita aprende Língua Portuguesa, ita mós tenke hatene kompeténsia eskrita sientífika no agradese ba Leitoradu Brazileiru nia suporta atubele lori fakuldade ne’e ba oin’’, dehan Eugénia. (*)