“Ho FIFA nia prezensa iha ne’e ita rona tiha ona informasaun sira sei tulun ita-nia federassun, ita-nia autoridade hodi hadi’a estadiun nasionál ida hodi bele halo kompetisaun internasionál iha tempu badak”, dehan Horta iha Palásiu Prezidente hafoin simu vizita husi trofeiu mundiál sábadu (11/06).

Hafoin vizita Prezidente pronunisa ba públiku katak iha semináriu oin segunda (13/06) prepara ona rai ida hodi halo kampu Futebol ida hodi prepara ba jogadór sira hodi kompete jogu iha internasionál sira.

“Segunda-feira Governu halo ona formaliza akordu ba atu hetan rai para ne'e ba kampu Futebol”, informa nia.

Prezidente Federasaun Futebol Timor-Leste (FFTL), Francisco Jerónimo Martins hatete, prezensa FIFA iha Timor-Leste sei lori motivasaun ba jogadór Timor-Leste hodi dezenvolve di’ak liután iha futuru.

“Trofeiu ne’e mai pelu menus motiva ita atu haka’as-an di’ak liután para ba futuru dezenvolve Futebol para sai Futebol Timoroan nia mehi”, afirma nia.

Iha tinan 2022, FIFA mundiál konsege vizita Timor-Leste tanba FFTL ho Governu Timor -Leste iha koordenasaun ne’ebé di’ak.

“Esforsu ne’ebé maka Governu halo iha parte hothotu presiza atu servisu hamutuk ita konsege relaiza loron ohin hodi lori tofeu to'o mak iha Timor-Leste”, hatete nia.

Iha loron segunda (13/06), FIFA sei testemuña hodi prepara kampu ida ba Timoroan sira bele hala’o jogu ho di’ak iha futuru mai. (*)