"Atividade balun ne'ebé agora dadaun sub-komisaun autoridade munisípiu baukau halo la'o uluk ona mak preparasaun ba sira ne'ebé halo preparasaun ba ísar bandeira", informa Sekretáriu Autoridade Munisípal Baukau, Simão dos Santos Marques Pinheiro, iha kna’ar fatin vila nova, kinta (21/10).
Ambítu ísar bandeira nivél nasionál iha Munisípiu Baukau ba loron 28 Novembro 2021 ne'e lolós foti ema ne'ebé atu dada bandeira kada Munisípiu hotu, maibé atravesa situasaun pandemia covid-19, nune'e parte nasionál husu Munisipiu Baukau rasik mak halo preparasaun.
Tanba ne'e, ekipa ne'ebé atu dada bandeira iha loron 28 Novembru husi Postu Administrativu neen (6) iha Munisípiu Baukau hamutuk na’in-51, no mós husi nasionál prepara tan ema na’in-25 atu kompleta liu tan.
Tuir nia, kona-ba fatin ne’ebé atu ísar bandeira laiha ona problema, tanba iha ona desizaun kolétiva ne'ebé liu husi enkontru ho diretores sira iha Munisípiu Baukau deside ona fatin seremonía ne'e, sei realiza iha Suku Gariuai.
"Servisu balun liliu seksaun logístiku la'o ona xefia direita husi Obras Públiku, dadaun ne’e organiza hela IG (Institutu Jestaun Ekipamentu) hamós ona fatin ba preparasaun nian”, hatete nia.
Nune'e mós dadaun komesa ateru ona husi darasula nian tama to'o Fatumaka ossuariu, tanba fatin ne’e mós sei tau aifuan iha loron komemorasaun ne'e, tanba hetan mós vizitasaun husi entidades nasionál no internasionál.
Nia garante fatin ne'ebé atu realiza seremónia, tanba parte autoridade seguransa Polísia Nasionál Timor-Leste (PNTL) no Falintil-Forsa Defeza Timor-Leste (F-FDTL) sei fó seguransa masimu. (*)