Autoridade lokál Xefe suku Tirilolo Postu aAdmistrativu Baukau vila, Munisípiu Baukau, Ricardo Ernesto Belo hatete, oras ne'e dadaun maioria povu Tirilolo liuliu aldeia haat hanesan Osso-ua, Lialailesu, Parlamentu no Caisido sira produtu barak mak dodook.
“Produtu ne'ebé kuda iha tempu udan mak tomate ho ai-manas hodi hetan osan ba sustenta ekonomia uma-laran, maibé produtu sira ne'e dodook hotu tanba labele lori sai ba fa’an, atu transporta ba Baukau ho Dili mós labele nune'e aat hotu”, dehan Ricardo ba www.tempotimor.com liuhusi telemóvel, kinta (18/03).
Maibé, iha tinan 2020 bainhira aplika estadu emerjénsia governu sei loke espasu ba transporte públiku hanesan mikrolet no bus halo operasaun nune'e fasilita produtu lokál fa’an iha merkadu maibé diferensia ho implentasaun serka sanitária ne'ebé bandu atu halo atividade.
"Regra kumpri maibé tomate no ai-manas la fa’an ne'e dodook de’it, oinsá governu nia mekanizmu kria kondisaun merkadu ba povu agrikultor, presiza tau atensaun”, dehan nia.
Governu rasik fó sai ona regra serka sanitária hanesan bandu atu komunidade sai husi uma, autoriza atu sai bainhira iha nesesidade urjente hanesan fa’an no sosa nesesidade baziku no bainhira la’o sai presiza iha karta autorizasaun husi Sentru Intergradu Jestaun Krize (SIJK).
Entertantu implenta serka sanitária iha Munisípiu Baukau hahú loron 15 to’o 29 fulan-marsu tinan 2021, hafoin bele haree fl progress kazurefere.(*)