Munisipiu Baukau sai nu'udar ezemplu ida husi munisipiu ne'ebé seidauk implementa masimu regras estadu emerjensia.
Pontu ida iha regras ne'e hatete katak transporte públiku sira labele halo movimentu, maibé realidade iha Munisipiu Baukau regra ida ne'e seidauk implementa ho di'ak.
Prezidente Autoridade Munisipiu Baukau, Antonio Guterres rekoñese katak transporte públiku iha Munisipiu Baukau sei halo operasaun.
"Laos totalmente mais balun sei serkula, tanba ne'e mak ema duvidas barak i ami ohin komesa tuur hamutuk par junta sekuensia avizu ne'e," dehan António ba www.tempotimor.com via telemóvel, Segunda (30/03).
Antonio dehan, parte autoridade munisipiu hamutuk ho ekipa konjunta PNTL, F-FDTL, Saude, Bombeiros, CVTL no Jestor Dezastre Naturais sei ezekuta pontus importante husi dekretu governu, no orientasaun husi husi Komando PNTL relasiona ho estadu emerjensia.
"Aban ami avizu i cek point iha dalan para prevene," dehan Antonio.
Aleinde ne'e, nia hatete, ekipa konjuntu Munisipiu Baukau daudauk ne'e halo fiskalizasaun ba loza sira iha Baukau relasiona ho maneira no fasilidade ne'ebé sira prepara.
"Loke tuir standar prevensaun nian ka loke hanesan babain, ekipa ne'e dadaun tuun ba loza sira."
Tuir planu, nia hatete, ekipa konjunta sei hato'o avizu ba populasaun sira iha Munisipiu Baukau husi rute tolu.
Rute dahuluk mak, Diresaun Wailili, Gariuai, Buibau, Samalari, Fatumaka, Darsura, Luilubu,Uatulari no Triloka; rute daruak mak Bukoli, Kairavela, Tirilolo, Caibada Uaima no Baukau Vila; no rute ikus mak Bahu, Kaibada Makasae, Buruma no Seical.