Tempotimor (Baukau)-Komandu Polísia Nasionál Timor-Leste (PNTL) Munisípiu Baukau deteta sidadaun indonezia halo peskas iligál iha tasi Baukau, maibé labele halo kapturasaun, tanba laiha ekipamentu Ró.

Komadante Komandu PNTL Munisípiu Baukau, Superintendente António De Sa, haktuir, fulan-dezembru tinan 2022 sidadaun husi ilha Wetar-Indonezia ho ró halo peskas ilegal iha tasi Timor, liu-liu iha tasi área Uaiono Uaisa'e, Suku Trilolo, Postu Administrativu Baukau Vila, uza Bomba Marotok konsege hamate ikan barak inklui estragus ahu-ruin balun iha tasi laran, maibé PNTL labele halo kapturasaun, tanba distánsia husi rai maran ba tasi klaran, kuazu metru-100.

Nune'e mós iha tinan-2023 fulan-fevereiru, semana kotuk ne'e, ró ida husi ilha Wetar-Indonezia, atraka tán iha área refere, deskonfia atu halo peskas ilegál, maibé la konsege, tanba haree hetan peskadór Timoroan barak iha hela área refere.

"Foin lalais akontese peska ilegál husi ita nia maluk nasaun viziñu mai iha tasi laran uza bomba marotok hamate ikan barak estraga mós ahu-ruin iha tasi laran, no ró ida mai tán iha semana kotuk ne'e, maibé ita labele halo kapturasaun, tanba laiha ró", dehan nia iha kna'ar fatin vila nova, tersa (21/02).

Husi akontesementu ne'e mós Komandu PNTL Munisípiu Baukau, kontaktu kedas ba Komandu Jerál PNTL, no orienta kedas ekipa Polísia Marítima to'o iha fatin refere, maibé tarde, tanba distánsia husi Dili ba tasi Baukau área Uaiono Uaisa'e dook.

Tuir informasaun ne'ebé Komandu PNTL Baukau hetan husi peskadór Timoroan iha área refere katak, peskadór ilegál sira konsege lori ona ikan barak iha tasi Uaiono Uaisa'e husi peskas ilegál ne'ebé sira halo.

"Komandu PNTL Baukau iha rekursu atu atua, maibé ita laiha ekipamentus ró, pelu menus iha ró-1 ou 2 para ita kontrola, tanba atividade hanesan ne'e iha tasi klaran ami haree de'it, labele duni atu ka'er ema, tanba ita laiha ekipamentu", nia akresenta

Enkuantu iha tinan-2022, komandu PNTL Baukau konsege kaptura sidadaun Indonezia balun, husi Ilha Keser ho ró halo peskas ilegál iha tasi Timor, liu-liu Munisípiu Baukau,  tanba halo koperasaun servisu ho peskdór Timoroan ne'ebé iha ró, uza hodi duni peskas ilegál sira.

Nune'e PNTL nafatin kumpri misaun servisu ne'ebé hatur ona katak, alende fó seguransa ba povu, fó seguransa mós ba riku-soin nasaun nian, liu-liu iha tasi laran no rai maran.

"Hanesan Autoridade seguransa hakarak asegura mós ita nia riku-soin iha tasi laran, maibé tenke apoiu ekipamentu, tanba liuhusi atividade hanesan ne'e bele ameasa ba ita nia vida, tanba bele mós lori Droga no Kilat", nia afirma

Entretantu preukupasaun ne'e, Komandu PNTL Munisípiu Baukau, relata ona ba Primeiru Ministru, Taur Matan Ruak, Ministru Agrikultura no Peskas inklui Vise Ministru Interior no Komandu Jerál PNTL atu responde hodi apoiu ekipamentu liu-liu ró, nune'e bele evita peskas ilegál iha tasi Baukau. (*)