"Iha horikalan tuku 02:19, komandu tátika UPM hala'o patrullamentu iha área Cristo Rei, iha fatin Dolokoan ne'ebá, konsege kaptura ema na'in-4 ne'ebé mak hatama sasan Ilegál. Totál ema iha ne'ebá ne'e, sira na'in-6, na’in-4 konsege UPM kaptura, na’in-2 halai. Ida halai liu ne'e, ema ne'ebé mak kaer ró ahi oan ne'e, bolu dehan kapitaun. Ida fali, na’in ba sasán sira ne'e", dehan Portavóz Komandu Jerál PNTL, Superintendente Arnaldo de Araújo, iha Kaikoli, tersa (31/08).
Sidadaun na'in-haat ne'e, timoroan na’in-tolu, Ricardo da Costa (21), husi Covalima Fatuliulik, José Martins, (22), Bobonaru-Marobo, Rosalino Gonçalves Maia (23), husi Bobonaru-Hauba, no Caitanus Maubutus (23), husi Atapupu-Indonézia.
Sidadaun na'in-4 ne'ebé kaptura, oras ne'e dadaun iha hela UPM nia liman, hodi hein prosesu investigasaun tuir mai.
Komandante UPM, Superintendente Basilio de Jesus hatete, evidénsia ne'ebé prende hanesan, tabaku lulun (joker), hamutuk kaixa 40, Ró ahi oan ida, motorizada beat metan ida, ho Xapa matrikula 0.3770, karreta rua, Carry mean ida, no Truc metan ida.
"Iha fulan-Jullu sira hatun sigaru dala-4, mais ita la hetan. Iha Agostu, sira hatama ona to'o dala-3 mak ita kaptura. Fulan-jullu ho agostu, sira hatun dala-8 ona, sira uza ró husi Atapupu, mai transaksaun sasán iha Cristo Rei. Kaer sira iha dadeersan tuku 02:19, no ita prende Sigaru (joker) iha 40 kaixas", informa Komandante Basilio, iha Lesidere.
Ho atu ne'ebé sidadaun sira komete, nu'udár fragante-de-litu, nune'e sei haruka kazu sira ne'e ba Ministériu Públiku (MP) hodi prosesa tuir lei ne'ebé vigóra iha Repúblika Demokrátika Timor-Leste (RDTL). (*)