Ho situasaun surtu Covid-19 risku tebes mai Timor-Leste, entaun tenke obriga atu hadi'a karreta sira ne'ebé difikulta PNTL nia serbisu.
"Agora daudaun ita obriga, tenke hadi'a karreta sira-ne'ebé mak para, bele ajuda sira, alende ne'e provizoriamente sira uza lai karreta ne'ebé agora disponivel hela para depois kuandu governu hetan, iha tán foun ne'ebé agora planu hela atu sosa, ne'e kuandu mai ita haruka ba," dehan António Armindo hafoin sorumutu ho Primeiru Ministru no Ministru Interior, Taur Matan Ruak iha Palásiu Governu, kinta (25/02/21).
Nia esplika, orsamentu ba hadi'a karreta ne'ebé kada tinan prevee hela hosi instituisaun PNTL ne'e rasik.
Difikuldade ne'e, la'ós foin akontese, maibé kada tinan karreta mak sai difikulta serbisu Komandu PNTL sira iha munisípiu.
"Ita konsidera ida-ne'e hanesan difikuldade boot, ne'ebé Munisípiu koko oinsá atu bele hadi'a," tenik nia.
Ho kestaun ne'e, iha tinan 2021 PNTL tau ona osan atu sosa tan karreta foun, nune'e bainhira buat hotu la'o di'ak bele distribui ba PNTL sira iha Munisípiu hodi hala'o serbísu. (*)