Tempotimor (Dili) – Ministru Agrikultura no Peskas (MAP), Joaquim José Gusmão dos Reis Martins rekoñese, membru Guarda Florestál  hamutuk 82 pesoas, la sufisiente atu halo atuasaun ka prevensaun ba ahi han rai no uma ne'ebé akontese kuaze iha munisípiu hotu-hotu.

Tuir MAP, iha ona planu atu rekruta tan membru Gurda Florestál no sosa ekipamentus, maibé orsamentu mak la to'o.

"Ita iha Guarda Florestál. Maibé, sira hamutuk 82 pesoas de'it i ekipamentus mós ladún kompletu atu halo prevensaun ba akontesementu ahi han rai. Ita presiza atu sosa ekipamentus no rekruta tan membru Guarda Florestál, maibé orsamentu uitoan ne'ebé ita iha, la to'o," dehan MAP iha Parlamentu Nasionál, Segunda (28/10/19).

Maski orsamentu la to'o, MAP dehan nia sei esforsu buka dalan, liuliu atu halo servisu hamutuk ho ministeriu sira seluk, hanesan Ministériu Interiór, parte PNTL no Sekretáriu Estadu Protesaun Sivíl (SEPS) para bele koopera, hodi hamenus ensinu ne'ebe iha rai laran.

Tempotimor (Dili) – Ministru Administrasaun Estatál (MAE), Jose Abilio Caitano rekoñese iha ona reuniaun no prosesu ona atu halo atendementu ba dezastre ne'ebé akontese iha Munisípiu  Bobonaro, Likisa, Ermera no Aileu ho lalais no iha tempu badak nia laran.

Reuniaun ne'e hahú ona iha Kinta, semana kotuk antes lori ba konsellu ministru. Enkontru entre Ministériu Solidariedade Sosiál Inkluzaun (MSSI), Ministériu Interiór (MI), Sekretáriu  Estadu Protesaun Sivíl (SEPS) no administradór munisípiu haat (4).

"Ami simu ona relatóriu inisiál husi munisípiu haat ne'ebé hetan dezastre anin boot no ahi han uma,” MAE ne'e dehan Palásiu Governu, Segunda (14/10/19).

Informasaun ne'ebé nia sumu hatete katak, iha Munisípiu Bobonaru, impaktu husi anin boot estraga komunidade nia uma kakuluk, inklui mós eskola ida no kapela ida.

José relata, iha Munisípiu Likisa anin sobu uma no ahi han plantasaun kafe. Maibé, sidauk iha totál  loloos. Entaun, preparasaun ba atendementu la'o dadauk no hein mós relatóriu loloos.

Iha Munisípiu Ermera, tuir MAE, ahi han uma no anin sobu uma hamutuk 296 i ahi han mós kintál  kafe hamutuk 100 hektares no iha Munisípiu Aileu, anin sobu uma hamutuk 29 no ahi han uma hamutuk hitu.

"Relasiona ho kasus hirak ne'e, Primeiru Ministru bolu ami atu oinsá para tuur hamutuk filafali hodi aprezenta buat ruma, para Governu bele foti asaun hodi halo atende lalais komunidade sira ne'ebé  hetan dezastre," tenik José.

Tempotimor (Dili) – Komesa dia 1 Outubru-7 Novembru 2019, rejista asidente hamutuk 191 no insidente hamutuk 151 iha territóriu laran tomak. Husi asidente no insidente ne'e, rezulta ema na'in 15 mak mate.  

Komandante Jerál Polísia Nasionál Timor-Leste (PNTL), Faustino da Costa informa asidente no insidente ne'ebé akontese durante Outubru to'o Novembru ne'e tanba sidadadun laiha konxiénsia morál hodi kumpri regra ne'ebé iha.

"Akontesimentu hirak ne'e akontese iha Lospalos, Mane-Haat Likisa, Oecusse no Kapitál Dili. Asidente ne'e fatór mínimu %5 husi natureza. Fatór ema mak fó kontribui boot liu,” informa Faustino iha Palásiu Prezidensiál Bairru-pite, hafoin enkontru semanál ho Prezidente Repúblika, Sexta (08/11/19).

Komjer PNTL ne'e fó ezemplu, asidente ema lanu todan xoke karau. Iha mós motor xoke ema la'o-ain. Nia dehan, ho nune'e bele hare'e katak dalaruma sidadaun seidauk iha konxiénsia di'ak no hakarak atu buat hotu lalais. Maski lei rasik hatete, kuandu ema atu hakat iha pasadeira (zebra cross), tenke para, fó  ema ne'e liu tiha lai.

Iha fatór seluk mós, tuir Faustino, motorista kolen ou laiha kondisaun di'ak bainhira halo viajen ba mai.

“Iha Dili tenta para atu redus asidente no insidente hirak ne'e, maibé agora ba fali munisípiu mak hanesan Leolima-Balibo, Suai no Quelicai. Ho nune'e signifika, ida ne'e la'ós dehan kapasidade husi polísia. Maibé, fatin akontesimentu ne'e sai husi área urbana,” Komjer Faustino esplika.

Nia dehan, ein prinsípiu la'ós kapasidade rekursu umanu PNTL. Maibé konxiénsia ema hotu nian mak importante.

“Tanba, kada suku iha ofisiál Polísia Suku no loos duni katak ema ida de'it. Entaun iha grupu ruma halo asaltu, entaun labele salta. Tanba ne'e, vijilansia ne'e sempre halo hela de'it ajuda husi UPF no BOP para atu tenta reduz insidente,” nia hatete.

Tempotimor (Dili) – Hatán ba preokupasaun públiku,kona-ba kazu krime ne'ebé akontese beibeik iha Kapitál Dili, Komandante Jerál (Komjer) PNTL, Faustino da Costa hatete, nia koloka ona nia membru sira iha fatin risku.

"Ha'u, la'ós atu hatán ba señor Ministru Interiór. Lae. Maibé, saida mak ami halo mak, desloka membru sira iha fatin ne'ebé risku, para halo servisu. Koloka membru sira ne'ebé tenke ser hala'o ninia servisu no haree mós ba poténsia risku," dehan Komjer Faustino, Kinta (21/11/19) hafoin hasoru Prezidente Repúblika iha Palásiu Prezidensiál, Bairru-pite, Dili.

Tuir Komjer PNTL, membru ne'ebé atu halo seguransa ba Kapitál Dili sufisiénte. Tanba membru hamutuk 500.

"Loos duni. Ami sei bele dehan katak membru sira iha Kapitál Dili sei sufisiénte. Tanba hamutuk na'in 500. Maibé, husi númeru ne'e balun la halo ona servisu ativu. Tanba, ida abandona servisu mak barak liu no balun moras permanente hanesan struk. Entaun, ita haree númeru ne'e 500. Maibé, realidade iha operasaun ne'e ema la to'o 500," nia esplika.

Esforsu Nafatin

Tuir Komjer Faustino, iha Kapitál Dili nia orienta ona ninia membru sira atu koloka ba postu permanente nomós postu movel.

“Postu permanente ne'ebé la'ós partensia ba tranzitu ne'e iha 9. Iha postu 9 ne'e, koloka ona membru kada postu menus liu mak na'in 4. Iha postu balun koloka na'in 6 to'o na'in 11,” Komjer ne'e esplika.

Nia afirma, postu permanente ba tranzitu iha Dili laran hamutuk 7, nune'e membru sira ne'ebé destaka iha postu sira ne'e hamutuk na'in 6.

"Membru sira ne'ebé destaka ba postu hirak ne'e, atu asegura 24 oras nia laran. Alende ne'e mós ita iha postu movél ba iha fatin sira ne'ebé bele dehan pertense ba risku," Komjer PNTL ne'e subliña.

Alende postu permanente no movel, iha mós postu permanente unidade nian. Ne'ebé, nia dehan, kalan-kalan ativu rutinas la'o nafatin fó seguransa ba komunidade Kapitál Dili.

“Uluk ita hanoin, membru sira uza sivíl mak ba de'it. Maibé, agora ita muda no tau fali farda ka atributu instituisaun PNTL nian," nia dehan.

Komjer Faustino mós husu ba membru PNTL sira ne'ebé hela iha bairru ka aldeia, atu kontribui mós ba paz iha ninia hela fatin.

Tempotimor (Dili) – II Vice Prezidente Parlamentu Nasionál (VPPN), Luis Roberto husu ba Ministru Interiór (MI) interinu, atu labele minimiza kapasidade Komandante Jerál (Komjer) PNTL, iha públiku.

"Nu'udar ministru, se bele karik problema ruma kuandu akontese, iha instituisaun rua ne'e nia laran. Tantu, F-FDTL no PNTL ba ko'alia iha uma laran. Labele ko'alia sai ba públiku dehan katak ita nia Komandante Jerál, inkapasidade tanba la hare'e membru sira. Ida ne'e, (problema) uma laran," hatete Luis iha Parlamentu Nasionál, Segunda (25/11/19).

Nia dehan, ministru iha dever morál ida kuandu akontese buat ruma iha institusaun nia laran, bolu fó hanoin la'ós fó sai ba públiku. Fó sai iha públiku hatudu katak ita hatún ita nia ema rasik. Ne'e, ita la fó kapasitasaun ba ita nia ema sira.

"Komandante Jerál PNTL la tau matan ba nia membru sira ne'e, faktus saida? Hakarak tau matan hanesan ne'ebé? Ha'u fiar katak (Komjer PNTL) Faustino, iha kapasidade atu jere institusaun ne'e la'o  ba oin. Koopera hamutuk ho membru sira, husi nasionál ba to'o baze," nia haktuir.

Relasiona ho ema oho malu, tuda malu no sunu malu iha fatin-fatin, Luis konsidera hanesan problema sosiedade. Nia dehan, ida ne'e la'ós problema ida akontese, hotu-hotu bou ba PNTL mak dehan seguransa inkapasidade.

"PNTL fó seguransa ba ema hotu. Maibé, kuandu halo problema ne'e sidadaun ho sidadaun. Labele bikan-kanuru tarutu, fó todan mak PNTL," Luis esplika.

Tempotimor (Dili) –  Atu atua no hapara kazu oho malu entre joven iha kapitál Dili, Ministru Interiór (MI) interino, Filomeno da Paixão de Jesus fó ona ordem eskritu ba Komandante Jerál PNTL, Komisáriu Faustino da Costa, hodi foti medida.

"Ha'u fó ona ordem ba Komandante Jerál PNTL, Komisáriu Faustino da Costa. Imi ( jornalista) ba husu nia, kona-ba servisu operasionál. Ema preokupa ho kapasidade komjer nian. Ita iha fulan tolu para atu haree. Maibé, ha'u fó ona tinan ida para komisáriu asegura. Maibé, tinan ida ona mós mosu nafatin," afirma MI interino ne'e iha Palásiu Governu, Kuarta (20/11/19).

Tuir atuál Ministru Defeza no Seguransa ne'e, kazu kontinua nafatin tanba menus eskala PNTL nian hodi halo servisu.

"Ha'u sente menus eskala karik. Iha Polísia ne'e, ema ida tenke servisu oras ualu. Purtantu, oras ualu ne'e nia kolokadu iha ne'ebé? Se operasionál, bainhira nia hahú iha meia noite, entaun nia tenke hotu iha tuku ualu dader," dehan Filomeno.

Governante ne'e dehan, bainhira eskala seguransa nian iha ona, mak Dili laran PNTL kontrola hotu. Tanba, ema servisu hotu tuir nia regras.

Realidade ne'ebé sei akontese, tuir Filomeno, PNTL labele halo seguransa ba ema ida-idak. “Tanba, seguransa ne'e la'ós iha Polísia nia liman de'it. Maibé, iha mós universidade, eskola sira, inan-aman no aspeitu sira seluk,” nia esplika.

Tempotimor (Dili) – Ministru Interiór interinu sei partisipa konferénsia internasional kona-ba terrorizmu nian, ne'ebé sei hala'o iha Austrália.

"Ohin, ha'u mai informa ba Primeiru Ministru (PM) hodi ba partisipa iha konferénsia no semináriu kona-ba "No Money for Terrorism” iha Austrália. Entaun aban lokraik ha'u aranka ba Austrália iha ámbitu Ministru Interiór (MI) nian," dehan Ministru Interiór interinu, Filomeno da Paixão de Jesus iha Palásiu Governu, Segunda (04/11/19).

Nia dehan, iha konferénsia ne'e nu'udar Ministru Interiór nia la ko'alia buat ida. Maibé, nia ba hola parte hodi rona saida mak sei ko'alia iha konferénsia ne'e.

"Ita ba iha ne'ebá la ko'alia buat ida. Ita hetan konvite atu ba hola parte iha konferénsia ne'ebé ko'alia kona-ba terrorizmu," Filomeno dehan.

Tuir nia, Timor-Leste presiza hola parte iha konferénsia ne'e, hodi nune'e bele hanoin mós ba situasaun seguransa iha rai laran.

“Liuliu kona-ba terrorizmu nian ne'e oinsá. Iha nivel hira ona, aas ona ka, médiu ka baixu," nia dehan.

.

Contact us

Palapasu
Dili, Timor-Leste
+670 7723 4852
+670 7728 1698
http://www.tempotimor.com