Tempotimor (Dili) - Relasiona ho akontesimentu sidadaun ida tama ilegalmente ba Aeroportu Internasionál Nicolau Lobato, Komoro, governu liuhusi Ministériu Interiór (MI) sei hasai seguransa sira ne'ebé servisu la sériu iha área ne’e.

Vise-Ministru Interiór (MI), António Armindo hateten, ba oin sei hadi'a seguransa iha Aeroportu Internasionál Nicolau Lobato, Komoro, atu bele kontrola ema ne'ebé tama ilegalmente.

"Sidadaun ida tama aeroportu ilegál, tanba ne'e mak horisehik orienta ona sekretáriu estadu atu haree asuntu ne'e, karik falla iha seguransa entaun ita troka tiha seguransa," informa Vise-Ministru Interiór, hafoin reuniaun Konsellu Ministru, iha Palasiu Governu, Kuarta (29/7).

Nia rasik seidauk hatene loloos akontesimentu ne’e, maibé iha ona orientasaun atu halo investigasaun ba akontesimentu ne'e rasik.

"Ha'u fiar katak sira tama husi sorin ne'ebé seguransa sivíl sira jaga ba, tanba ne'e ita halo ona orientasaun para halo investigasaun karik seguransa sira mak la di'ak hasai," tenik nia.

Tuir António, relasiona ho akontesimentu sira hanesan ne'e, importante tenke hadi'a para rigorozu kontrola ema ne'ebé bele tama no labele tama.

Antes ne’e, akontesimentu sidadaun ida tama ilegalmente ba Aeroportu Internasionál fatin aviasaun nian, iha Tersa (28/7), maizumenus tuku 07:45. (*)