Xanana Gusmão ne’ebé sai husi Timor-Leste ho Aviaun Air Asia, sesta (17/06), tuku 10:45, hetan akompña husi delegasaun husi Przidente Repúblika, Ramos Horta, Sekretáriu Jerál Partidu CNRT, Francisco Kalbuadi Lay, membru Partidu CNRT to’o iha Aeroportu Komoro.

Iha vizita servisu ne'e Xanana Gusmão sei Bruxelas kapitál nasaun Beljika atu partisipa atividade Forum Loron Dezenvolvimentu Uniaun Europeia tinan 2022, hafoin kontinua ba viajen ba Londres (Iglaterra) no Lisboa (Portugal).

“Líder Istóriku Kay Rala Xanana Gusmão iha loron 17 Juñu to’o 12 Jullu 2022 sei aranka Bruxelas hodi atende Forum Loron Dezenvolvimentu Uniaun Europeia 2022 nian husi 18-22 Juñu”, informa Komunikadu ne'ebé www.tempotimor.com, asesu husi mídia Partidu CNRT nian, sesta (17/06).

Tanba Xanana hanesan Xefe Negosiadór ba Fronteiras Marítimas Timor-Leste nian nune'e sei hala'o fali viajen ba Londres hodi hala'o reuniaun estratéjika ho Konsellu Jurídiku sira kona-ba Negosiasaun Fronteira sira Rai no Tasi nian.

Hafoin ida ne'e, sei hala'o fali nia viajen ba Lisboa hodi lidera delegasaun Timor-Leste nian ba Konferénsia Oseanu ne’ebé organiza husi ONU iha loron 27 Juñu to’o 1 Jullu hanesan Reprezentante Espesiál Prezidente Repúblika nian no Timor-Leste nia Reprezentante Espesiál ba Ekonomia Azul.

Xanana ho ekipa sei hala'o mós atividade sira ne’ebé g7+ mak organiza nu’udar Pessoa Eminente g7+ nian.

Ho atevidare viajen ne'e mak Prezidente Repúblika, José Ramos Horta deside akompaña Xanana to’o iha Aerporto Internasional Prezidente Nicolao Lobato Komoro. (*)