Tuir informasaun ne’ebé www.tempotimor.com, asesu iha pájina Relasaun Públika F-FDTL, tersa (06/09/2022 katak, bazea ba diretiva númeru 009/CEMG Das F-FDTL/2022. Komisaun rekrutamentu militare foun tinan 2022, hakarak fó sai ba públiku katak komisaun rekrutamentu konklui ona teste médiku, psykotes, entrevista no fisíku ba aplikasaun sira hamutuk 1.422 pesoál husi munisípiu 13, inklui RAEOA.

Husi totál aplikante ne’ebé ekipa komisaun halo ona verefikasaun tuir rezultadu teste aplikantes ida-idak nian no selesiona aplikante atus-neen (600) mak pasa, hodi inkorpora ba Sentru Instrusaun Komandante Nicolau Lobato-Metinaro.

Ho ida-ne’e komisaun rekrutamentu FALINTIL-Forças da Defesa de Timor-Leste, sei desloka ba munisípiu no RAEOA iha loron 05 setembru to’o loron 13 setembru 2022 hodi taka naran aplikantes ne’ebé selesionadu ka apto iha teste hirak ne’e.

Iha rekrutamentu ne’e, husi totál aplikante 600 ne’ebé selesionadu komisaun rekrutamentu fó prioridade ba igualdade jéneru pursentu sanolu-virgula-lima (10,5%) feto no 89,5% mane.

Tanba ne’e, husu ba kandidatus sira atu ba haree naran no informasaun adisionál ne’ebé taka iha idak-idak nia sede munisípiu, Postu Administrativu, Sede PNTL iha munisípiu no Postu Administrativu sira.

Komisaun rekrutamentu mós hakarak hato’o informasaun importante ba aplikante sira ne’ebé atu inkorpora iha Sentru Instrusaun Komandante Nicolau Lobato (CICNL)-Metinaru atubele haree informasaun sira ne’ebé públika sai.

Ba aplikantes aptu sei aprezenta-an iha Kuartel Jenerál F-FDTL Fatuhada-Dili iha loron 19 setembro 2022, hodi halo konfirmasaun no sei transporta ba Metinaru iha loron 20 setembru 2022 ás 07:30 otl.

Nune’e kada kandidatu ne’ebé aptu tenke ba loke kedas konta bankária ida-idak nian tuir banku ne’ebé nia hakarak, no kada kandidatu tenke lori kopia kolorido konta bankária tahan ida, kartaun eleitorál, no foto koloridu 3x4 tahan (2), iha loron ne’ebé aprezenta-an iha Kuartel Jenerál F-FDTL, Fatuhada, Dili.

Kandidatu tenke lori ropa jinastiku, sapatila, no meas mutin par rua (2), kalsa metan badak no kamijola mutin par (2), no kada kandidatu autorija de’it lori roupa sivíl kalsa naruk no kamija gola par (2).

Iha ne’e mós fó sai katak, kandidatu sira lori mós lamina koir hasan rahun pak ida, eskova ho grasa sapatu kór metan (kiwi), relojiu liman ida (woter resist), no kandidatu ba aprezenta-an tenke tesi fuk badak (sentimu ida) ba mane, no feto (sentimu sanulu). (*)