Tempotimor (Díli)-Prezidente no Diretór Ezekutivu Autoridade Nasionál Água e Saneamentu, institutu públiku (ANAS-ip), Domingos Pinto hatete, iha tempu badak sei gegula komunidade ne'ebé mak estraga bee iha fatin públiku.

“Tanba ida ne'e mak ami hahú fó xamada, ami seidauk bele regula ita bele dehan bele fó sansaun ruma tanba ami iha hela faze preparasaun ba kuadru legal sira maibé iha tempu besik ami sei hahú e ami sei bolu ema hotu ne'ebé halo perfurasaun atu sira mai rejistu e ita komesa halo regra ruma para iha futuru hahalok sira ne'ebé bomba soe arbiru de'it ne'e ita bele regula se la’e difísil”, dehan Domingos iha sede ANAS-ip, Kaikoli, kinta (08/07).

ANAS-ip foin hahú maibé orienta ona nia Diretór sira halo inspesaun no haree razaun saida mak komunidade sira husik bee iha fatin públiku sira.

“Hanesan iha semana kotuk ha'u haruka diretór sira ba halo inspesaun, ami foin mak hahú seidauk bele halo buat barak, maibé semana kotuk ami hahú atu haree problema saida mak sira husik bee sulin arbiru, kuandu ita hadi’a jestaun bee, bele labele estraga tanba iha depósitu bee iha rai okos kuandu ema seluk hamenus entaun nia sakrifika ema seluk iha área seluk”, esplika nia.

Tanba ANAS-ip rasik servisu tuir dekretu lei 38/2020 de 23 de Setembru ne'ebé anexu, atu regula abstesimentu bee hothotu, nia atu regula bee iha ka la’e, tanba saida mak bee laiha ida ne'e, no tau matan ba bee nia kualidade no kuantidade sira. (*)