Tempotimor (Dili) – Deputadu AMP, Sabino Soares ‘Guntur’ konsidera Prezidente Repúblika, Francisco Guterres Lú-Olo ukun ho autoritáriu, maski Timor-Leste adota sistema demokrasia.

Guntur hatete lia hirak ne'e, relasiona ho membru Governu indijitadu na'in 9, ne'ebé to'o agora seidauk hetan tomada pose husi Prezidente Repúblika.

“Membru Governu indijitadu na'in 9, hetan kondenasaun husi Prezidente Repúblika. Maski Tribunál Rekursu anunsiu katak membru Governu indijitadu sira ne'e laiha kazu,” hatete Guntur iha Parlamentu Nasionál, Kuarta (23/10/19).

Alende ne'e, deputadu Duarte Nunes husi Bankada CNRT katak bainhira Prezidente Repúblika la fó razaun kona-ba membru Governu indijitadu ne'ebé to'o agora seidauk hetan pose, CNRT sei mantein lista ne'ebé iha.

"Ami hein prezidente fó nia sala para ami troka. Sei ami tau ita boot sira iha fatin ida, tanba de'it PR la gosta ema ne'e, atu troka ne'e la justu. Tan ne'e, CNRT sei mantein to'o tinan 10 mós di'ak, tanba ema ne'e mós direitu iha," nia tenik.

Tempotimor (Dili) – Deputadu Bankada oposizaun FRETILIN, Joaquim Do Santos ‘Borluli’ hatete halo polítika labele hanoin pragmatizmu no deskontente, fahe kargu ba malu. Maibé, presiza halo polítika ida ne'ebé, interese ba ema hotu-hotu.

Deputadu ne'e subliña, iha estrutura VIII Governu, KHUNTO mós iha posizaun ida husi AMP no okupa mós iha kargu balun hanesan MSSI, MTK no iha tan diresaun balun.

"KHUNTO, labele hanoin atu kaer hotu kedan estrutura Governu nian, no labele halo polítika tanba  laran moras. Maibé, halo polítika tenke iha konsensus eleitorál ne'ebé hetan husi povu," espera deputadu Joaquim ‘Borluli’ iha Parlamentu Nasionál, Tersa (22/10/19).

Nia dehan, VIII Governu nia benefisiu la'ós ba AMP. Maibé, benefisiu ne'e ba povu. So ke povu mak seidauk sente benefisiu ne'e.

"Halo polítika labele la kontente ho ita nia desejos ne'ebé la hetan kargu. Ne'e la'ós polítika. Maibé, ne'e pragmatizmu. Tuir loloos, ema sira pragmatiku ne'e lalika mai halo polítika iha Parlamentu Nasionál. Pragmatiku ne'e, ba fa'an modo iha merkadu de'it. Mai iha Parlamentu Nasionál ne'e so ema rasionál. Hanoin ba estadu tomak," dehan Borluli.

Nia espera, VIII Governu ne'e importante mak kumpri komprimisiu eleitorál komum nian, ne'ebé  atu harii kampu traballu iha tinan lima nia laran ne'e. Loloos KHUNTO ko'alia ba asuntu ne'e.

"Hanesan Partidu FRETILIN la kontente kuandu partidu aliadu sira hamutuk hetan tiha votus depois mai fahe kadeira ba malu. Balun kontente i balun la kontente. Pois, dalan klaran sobu malu. Ne'e ladún di'ak. Tanba, vitima ne'e povu," afirma Borluli.

Nia dehan, atu ukun presiza hanoin rasionál. Povu nia interese ne'e importante. Partidu polítiku ne'e hanesan instrumentu hodi reprezenta aspirasaun povu nian, hodi mai foti desizaun polítika nian.

“Ha'u ko'alia la defende ba individu no grupu. Maibé, halo polítika para defende konseitu estadu ou konsensia aspirasaun povu nian komum," nia esklarese.

Tempotimor (Dili) – Konsellu Diretiva-Aliansa Mudansa ba Progresu (KD-AMP), seidauk iha hanoin atu ba Eleisaun Antesipada (EA), bainhira polémika membru Governu na'in 9, seidauk rezolve.  

“Deklarasaun Primeiru Ministru Taur Matan Ruak kona-ba ida ne'e, dala ruma faze ida atu hatán de'it ba deklarasaun KHUNTO iha Parlamentu Nasionál. Tanba, AMP seidauk iha diskusaun, seidauk tuur hamutuk hodi hanoin problema to'o boot, hanesan Eleisaun Antesipada,” hatete Deputadu CNRT, Duarte Nunes iha Parlamentu Nasionál, Tersa (22/10/19).

Molok ne'e, remata hasoru malu ho Prezidente Repúblika iha Palásiu  Prezidensiál, Bairru-Pite, Dili, Tersa, PM Taur Matan Ruak ba jornalista katak, nia prontu atu ba Eleisaun Antesipada, bainhira polémika kona-ba membru Governu na'in 9 labele rezolve.

Duarte hatete, AMP seidauk iha hanoin to'o iha Eleisaun Antesipada. Maibé, nia dehan, AMP tenta atu rezolve polémika membru Governu na'in 9, ne'ebé la hetan pose husi Prezidente Repúblika.

"Ami AMP seidauk ko'alia, ami iha ona intensaun atu haree took problema ne'ebé sira ezije ne'e to'o iha ne'ebé. Karik, loron ida ami mós bele hola desizaun hamutuk. Karik iha intensaun hamutuk, para atu hato'o lista foun karik. Ami bele ko'alia para PM bele hato'o lista foun," dehan Duarte.

Nia dehan, AMP sei hola desizaun ba deklarasaun deputadu KHUNTO nian, ne'ebé provoka PM hasai deklarasaun kona-ba Eleisaun Antesipada.

"Tanba iha bankada, ida ne'ebé ami hakarak, ami bele hato'o. Ne'ebé, ami sei tenta ko'alia desizaun saida mak ami hola kona-ba deklarasaun deputada Olinda Guterres nian, depois PM hasai estatementu ida ne'e. Ne'ebé, ida ne'e sei parsiál husi AMP, seidauk anivél AMP," deputadu ne'e afirma.

Tempotimor (Dili) – Deputadu opozisaun iha Parlamentu Nasionál husu ba Governu daualu ne’ebé lidera husi Primeiru Ministru Taur Matan Ruak, atu hatudu rezultadu serbisu loron 100.

Deputadu husi Bankada FRETILIN, Dario Madeira sisi promesa Governu bainhira simu pose katak sei halo esforsu hotu-hotu iha loron 100, hodi hatudu rezultadu ba povu Timor-Leste.

“Ha’u reprezenta (povu) iha Parlamentu Nasionál ida ne'e, hakarak atu ko'alia tanba tempu mós besik ona. Orsamentu ba tinan 2020 atu mai ona PN, atu tama ba diskusaun,” Dario deklara iha PN, Tersa (15/10/2019).

Hanesan deputadu ne’ebé durante ne’e tuun ba hala’o kontaktu eleitorál iha baze, Dario hatete, nia sempre simu pergunta barak kona-ba kestaun ne’e.

Tanba ne’e, nia dehan, nu’udar reprezentante povu, nia iha obrigasaun ida atu husu tutan ba Governu kona-ba promesa ne’ebé halo ona.

“Hahú formasaun Governu (VIII) Señor Ministru sempre koalia katak “ami sei halo esforsu hotu-hotu iha 100 dias ami sei hatudu rezultadu,” dehan Dario hodi repete promesa ne’ebé Governu fó.

Maibé, nia hatutan, ohin loron povu husu rezultadu serbisu loron 100 mak ne’ebé?.

“Halo favor hatudu ba votante sira par sira mós bele hatene ida ne'e,” dehan nia.

Deputadu ne’e dehan, promesa ba loron 100 ne’ebé Governu AMP fó to’o ohin loron prejudika nafatin povu, liuliu iha área  Saúde, Bee-moos, Agrikultura, no Infraestrutura.

“Área hirak ne’e iha baze sei nafatin sai problema,” dehan nia.

Tempotimor (Dili) – Bankada FRETILIN iha Parlamentu Nasionál (PN) husu ba bankada Governu atu labele 'show force' ba proposta lei atividade petrolífeiru no lei fundu petrolífeiru ne'ebé hetan veto husi Prezidente Repúblika. Tanba, tuir bankada oposizaun ne'e, buat ida mak inkonstituisionalidade kontinua inkonstituisionalidade.

"Se ita hakarak show of power ne'e ita la'o. Maibé, ita la muda buat ida. Ida inkonstituisionalidade kontinua inkonstituisionalidade. Tanba la tuir buat ne'ebé mak tribunál hatudu nia konsekuénsia mak diploma ne'e sei la hetan promulgasaun," deklara Prezidente Bankada FRETILIN, Aniceto Guterres Lopes iha plenária PN, Tersa (08/10/19).

FRETILIN husu ba bankada Governu, atu halo reformulasaun ba diploma rua ne'ebé hetan julga husi Tribunál Rekursu no inkonstituisionalidade.

"Husu ba bankada Governu, mai ita hamutuk halo reformulasaun ba diploma sira ne'e, hanesan obrigasaun konstituisionál atu kumpri Konstituisaun RDTL no desizaun tribunal, nu'udar desizaun aas liu iha estadu Timor-Leste," dehan Aniceto Guterres.

Hatán ba deklarasaun ne'e, Prezidente Bankada CNRT Duarte Nunes katak, bankada Governu iha ona kondisaun ba halo reformulasaun ba diploma lei atividade petrolífeiru no lei fundu petrolífeiru.

Iha fatin hanesan, Bankada Partidu Libertasauan Povu (PLP), Maria Angelina Sarmento katak PLP prontu halo apresiasaun ba artigu ne'ebé mak ein kestaun.

"PLP Laiha objetivu show force. Maibé, oinsá mak show force be with dezenvolvimentu ba povu ida ne'e, atu lori dezenvolvimentu ne'ebé di'ak no sustentavel," dehan Maria.