Xefe Bankada FRETILIN, David Diaz Ximenes ‘Mandati' hatete, kargu Prezidente Repúblika, ida ne'e atu asegura estabilidade nasionál, nomós estabilidade instituisionál, no sei la fumenta ba krize instituisionál.

“Ne'e mak ohin, ha’u xamada atensaun, e ha’u la temi partidu ida nia naran, maibé ha’u temi ema ne'ebé ko'alia ne'e, ha'u la fi'ar katak partidu ida ba fumenta katak sa'e ho sa'e hasai kedas iha ne'e, ha'u la fi'ar”, dehan Mandati liuhusi deklarasaun polítika iha plenária PN, tersa (25/01).

Tanba konstituisaun la fó dalan ba ida ne'e, no nasun Timor-Leste ne'e nu’udar post konflitu, bainhira disolve Parlamentu Nasionál, FRETILIN la fiar duni atu akontese.

“Ne'e mak ha’u halo deklarasaun ida ne'e, e porque ne'e mak deklarasaun ne'e kontra o versiál, quanto mais, ao Lauriado da Paz ida mak ha’u”, dehan nia

Momentu ne'ebe atu simu Nobel da Paz, ida ne'e kooperasaun ema hothotu ne'ebé funu iha Timor ninia repurkusaun mak ema na'in-rua ne'e ba simu, maibe la'ós grupu ida nian, nein ema ida nian de'it, purtantu timoroan hothotu terus.

"Ne'ebé maun boot sira kuandu halo ida ne'e, loloos sira laran luak estadista saida mak sira bele halo para tur hamutuk ita ko’alia. Ha'u sempre iha ne'e, ko’alia kona-ba diálogu, hadi’a tiha de'it, kontra malu, diferensa, krítika malu ne'e normál, ne'e harus, e ha’u sei halo tan deklarasaun ida kona-ba ida ne'e”, deklara nia.

Xefe Bankada KHUNTO, Olinda Guterres hatete, kona-ba deklarasaun disolve Parlamentu Nasionál ne'e, husu atu di’ak liu na'in-ulun sira lalika ameasa malu.

Tanba partidu KHUNTO nia ema mós la’ós ema oituan, no FRETILIN nia mós la'ós oituan, CNRT nia ema mós la’ós oituan, no kandidatura ne'ebé iha sira sei hadau malu, tanba ne’e buat ida ameasa atu disolve Parlamentu ne'e susar.

“Kandidtura ne'ebé mak atu manán ne'e manán ba, labele mai ameasa fali depois ita-nia ema iha baze ne'eba tur rai la metin”, dehan nia.

Maske, iha kandidatura balun ne'ebé mak kaer ukun tiha ona, asume Prezidente Repúblika, no Primeiru Ministru, inklui asume buat hothotu, maibé di’ak liu lalika ameasa malu. Tanba iha leten líder sira ameasa malu maibé povu iha kraik kontinua terus.

“Hau-nia ema sira ne'ebé iha Munisípiu 13, rona mai imi hakmatek, sei la akontese buat ida ne'ebé atu disolve parlamentu. Olinda sei tur iha ne'e to'o mate, se mak sei sa’e ba Prezidente Repúblika sei la disolve parlamentu”, hatete nia. (*)