"Prezidente seidauk fó sai data eleisaun ninia, maibé ha'u ko'alia beibeik ona ita nu'udar ema, e ha'u mós nu'udar líder ida, ne'e ultima kareira ona, sé ha'u kandidata-an ba prezidente, e karik ha'u sei ba prezidente ne'e ultima kareira ona, tinan lima ida ne'e, tinan ida ne'ebé ano desizivu e tinan ida que determinante ba futuru nasaun ninia”, dehan Jenerál Lere bainhira partisipa iha Aniversáriu Komponente Navál Falintil-Forsa Defeza Timor-Leste (F-FDTL) ba dala-20, iha Hera, kuarta (12/01).

Tanba tinan lima (5) mai ne'e, entrega ona ba jerasaun foun hodi kontinua lidera nasaun ba futuru, maibé hetan apoiu nafatin husi jerasaun tuan sira.

"Tinan lima mai ne'e ita entrega ba jerasaun foun, e ha’u bele dehan katak ha'u prezidente ka la prezidente, iha tinan 2027 ha'u sei apoiu ha'u-nia kandidatu joven ida, agora ha'u seidauk temi naran mais ha'u hanoin ona, joven ida ne'ebé mak sai ha'u nia kandidatu ba PR iha tinan 2027. Ida ne'e mak ha'u-nia hakarak”, hatete Lere.

Kuandu Prezidente Repúblika (PR) dekreta ona tempu to’o ona, Xefe Estadu Maior Jenerál F-FDTL, Tenente Jenerál Lere Anan Timur kandidata-an, no sei reforma husi Institutuisaun F-FDTL hodi entrega mós Institutuisaun F-FDTL ba jerasaun foun.

"Ha'u 70 anos ona, ha'u hanoin katak to’o tempu ona ita passa ba ita-nia jerasaun tuir mai, ha'u labele privatiza fali Institutuisaun F-FDTL hanesan ha'u-nia, hanesan ha'u dehan ita sidadaun iha rai ida, iha nasaun ida, iha misaun rua de'it, dever mak rua de'it, ida mak serbí Estadu ida mak serbí família, e agora ha'u tinan barak ona, ha’u servi estadu, e agora mós to’o tempu ha'u ba servi ha'u-nia família”, afirma nia. (*)