Governu Presta Omenajen ba Deputadu Silvino Morais"Ha'u hakarak hato'o Governu ninia votu de pezár, votu kondolénsia ba falesimentu husi distintu Deputadu Silvino Adolfu Morais, fó profunda tristeza no konsternasaun mak Governu Timor-Leste fó Kondolénsia ba deputadu ne'ebé mate iha loron tolu (03) fulan-janeiru tinan 2022 iha Ospital Guidu Valadares iha Dili ho tinan 66”, dehan Fidelis, hafoin reuniaun Konsellu Ministru iha Palásiu Governu, kuarta (05/01).

Deputadu Silvino Adolfu Morais, moris iha loron 19 fulan-jullu tinan 1956, iha Atabae, Munisípiu Bobonaru.

Tinan 1984 Saudozu tama Uniaun Nasionál dos Estudantes Timorenses, ne'ebé koñesidu hanensan UNTIM, no partisipa diretamente iha luta kontra kolonialista ho invazaun Indonézia nian iha tinan 1975.

Iha tinan 1977 Saudozu assume kargu hanesan Komandante seksaun ba Kompaña Intervensaun nú 04 iha Kailaku-Bobonaro depois tinan rua hetan kapturasaun husi Militár Indonézia sira.

Iha dékada tinan 1980 nian to'o 1999, matebian nu'udar funsionáriu públiku ne'ebé servisu iha Eletrisidade iha Munisípiu Bobonaro nian.

Depois referendu iha loron 30 fulan-agostu tinan 1999 assume kargu oioin iha natureza polítika iha partidu FRETILIN (Frente Revolusionáriu Timor-Leste Independente) nia laran.

"Iha eleisaun ba Parlamentu iha tinan 2017 re-eleitu iha tinan 2018 no adapta nia hanesan membru komisaun C iha Parlamentu Nasionál”, hatutan nia.

Saudozu hanesan Deputadu iha Parlamentu Nasionál dalabarak nia halo intervensaun liliu assuntu sira ne'ebé iha ligasaun iha nia Munisípiu, área fronteira nian no asuntu seluk ne'ebé mak sai preokupasaun nasionál nian. (*)