Tempotimor (Dili) – Forum Organizasaun Naun-Governamental (ONG) Timor-Leste, kontinua husu ba Prezidente Repúblika (PR) Francisco Guterres Lú Olo atu veta proposta lei ne'ebé Governu haruka ona ba PR, liuliu proposta kona-ba lei Atividade Petrolífeiru (AP) no Fundu Petrolífeiru (FP).

Koordenadór ONG La'o Hamutuk, Celestino Gusmão hatete, Forum ONG halo ona audiénsia ho PR hodi husu PR atu veta proposta alterasaun lei atividade petrolífeiru no fundu petrolífeiru.

 

"Ami mai hasoru malu ho PR husu atu sua exelénsia kuidadu no veta proposta alterasaun ba lei atividade petrolífeiras no fundu petrolífeira. Dala ida tan, ami mai ko'alia ho PR atu veta proposta alterasaun ba lei AP no FP," dehan Celestino Gusmão iha Palásiu Prezidensiál Bairru-pite, Kinta (08/08/2019).

 

Nia afirma, iha razaun rua mak hanesan.  Ida, diskusaun ne'ebé halo iha Parlamentu Nasionál Timor-Leste no iha fatin seluk, seidauk bele konvense Forum ONG hodi apoiu ba proposta alterasaun ne'e rasik. Liuliu kona-ba artigu 15 parte (a), ne'ebé PN no Governu aumenta iha lei Fundu Petrolífeira, kona-ba investimentu instrumentu públiku no privadu liuhosi  Timor Gap.

 

Tuir Celestino, aumenta iha artigu 15 parte (a) ne'e fó perigu no prejudika ba Fundu Petrolífeiru. "Ida ne'e, perigozu tanba prezudika Fundu Petrolífeira. Objetivu husi FP mak atu sustenta jerasaun agora no jerasaun oin mai. Imajina, FP menus husi tinan 10 ita bele hakerek iha surat tahan de'it kona-ba istória FP. Maibé, jerasaun tuir mai la hetan buat ida," nia dehan.

 

Razaun seluk, tanba bainhira fokus liu ba FP, seitór hirak ne'ebé liga ba povu nia moris kontinua hakdasak. "Kuantu mais ita nia konsentrasaun ba FP, seitór sira ne'ebé liga direta ba ema ki'ak sira kona-ba má-nutrisaun, edukasaun, saúde, bee no saneamentu, kondisaun laiha atu book aan. Ema ki'ak sira kontinua hela ho difikuldades oioin," Celestino esplika.