"Ha’u mós haree ona notas balun liuhusi enkontru tékniku sira ba apoiu parseiru sira ne’ebé durante ne’e hala'o ho kooperasaun ho MSSI liuhusi diresaun relevante sira la'o di’ak tebes. Ha’u hakarak aprezenta mós votus de agradesimentu ba biban sira ne’e”, dehan Armanda Berta, iha otél Timor, kinta (22/07).
Hahú kedas iha primeiru Governu konstitusionál, MSSI hetan ona apoiu hosi parseirus dezenvolvimentu sira hodi dezenvolve nia sistema protesaun sosiál, iha kontestu internasionál, Estadu mak autór prinsípal ba ajenda 2030 ho nia objetivu dezenvolvimentu sustentavel (ODS).
Tanba ne’e mak nesesáriu agora ba oin hahú haree oinsá mak Timor-Leste bele iha politika, sistema no medida ba protesaun sosiál ne'ebé adekuadu.
Ho enkontru hanesan pasu importante tebes hodi identifika prioridade sira hodi aliña ho asisténsia externa no atu asegura sustentabilidade implementasaun programa ne'ebé orientadu ba rezultadu ne'ebé maximu no favoravel.
"Atu atinje mehi ida ne’e, ha’u enkoraja parte hothotu atu koordena no kolabora teknikamente iha definisaun liña no estratéjia, konsulta no diskusaun orizontál presiza funsiona iha ámbitu amigavel”, haktenik nia.
Kompromisu Governu konstitusionál ne’ebé rekuñese papél importante ba redusaun pobreza mak hahú dadaun projeta reforma ba programa bolsa da mãe jerasaun foun hanesan instrumentu ida hodi tulun dadauk todan ne'ebé família balun enfrenta.
"Ita hotu hein katak ho implementasaun programa bolsa da mae jerasaun foun bele hatudu impaktu ne'ebé pozitivu, liliu iha ámbitu redusaun pobreza, mellora rezultadu iha saúde, nutrisaun no edukasaun, nune’e, neneik no bebeik MSSI ho apoiu partes relevante sira bele lori Timoroan sira ba ambiente moris ho kondisaun bem estar ne'ebé agradavel”, afirma nia.
Partisípa iha reuniaun ne’e, Carli Shillito reprezentante husi embaixada Austrália, Roy Trivedy Koordenadór Rezidensia UNO, Tuya Altangerel Reprezentante UNDP, Ilsa Meidina Reprezentante Banku Mundiál, Emmanuelle Collet Reprezentante UNICEF, Claude Nomsi Mpirat Reprezentante UNCDF, Rita Fernandes Reprezentante ILO, Dageng Liu Reprezentante WFP, Sunil Smitra Reprezentante ADB, Inga Mephan Reprezentante PHD, David Roach Reprezentante CATALPA INTERNATIONAL, Antonio Freitas, DG Mobililizasaun Rekursus Externo Ministériu Finansa, no Kargu Xefia sira hotu. (*)
