Preokupasaun ne’ebé mai husi Deputadu bankada CNRT, Domingos Carvalho, nia parte lamenta tebes ho ró Tranship II ne'ebé mak governu aluga ho kondisaun la seguru hodi lori risku ba sidadaun Timor-Leste no gastu osan povu nia
“Ró ne'e atu mai ona foin pinta, ró dodok ida que eskada e chaparia sira ne'e hotu dodok no kuak e ita kuandu hakat sa’e ba mós ita kuidadu tanba iha ninia solda sira ne'e aat hotu, odamatan no janela sira ne'e hodi hela tali rafia mak kesi, no atu para de'it mós han oras lubuk ida, ne'e ita lakon de'it osan ba ró dodok ne'e, nusa osan ne'e ita la uza hodi halo uma ba kbi’it laek sira”, dehan deputadu Domingos iha plenária PN, segunda (14/06).
Maibé MAPKomS, Francisco jerónimo hatete, ró ne'e foti dala barak e hato'o ona iha Konsellu Ministru no ba ministru konpetente atu haree.
“Los duni saida mak akontese iha sesta-feira, iha Ataúro ne'e mós lamentavel, tanba kapitaun ró, ou ró mak la di’ak ou kapitaun mak laiha esperiénsia, ita mós la hatene, maibé sei halo hela investigasaun hodi hatene tanba saida”, dehan Ministru Francisco iha plenária PN.
Tanba ne’e, sei hato'o filafali ba parte kompetente atu haree ba kestaun ida ne'e. (*)