Iha loron 26 fulan-abril, Prezidente Repúblika, Francisco Guterres ‘Lú Olo’, sei reune ho Konsellu Estadu no Konsellu Superior Defeza no Seguransa hodi rona hanoin sira relasiona ho Governu nia pedidu ba renovasaun estadu emerjénsia ba periódu loron tolunulu ba oin.
"Periódu loron tolu-nulu (30) estadu emerjénsia ba dasanuluk-resin-rua, hahú husi 3 abril, sei termina iha 2 maiu 2021. Reuniaun Konsellu Superior Defeza no Seguransa sei hahú aban, tuku 9 liu minutu 30 dadersan no Konsellu Estadu, sei hahú tuku 11”, deklara karta komunikadu www.tempotimor.com asesu, domingu (25/04).
Tanba iha loron 21 fulan-abril 2021, Konsellu Ministru aprova renovasaun estadu emerjénsia no hato’o pedidu ba Prezidente Repúblika evolusaun preokupante ba situasaun epidemiolójika no proliferasaun kazu rejistadu ho COVID-19, iha nível mundiál, rejionál, liuliu iha Timor-Leste ne’ebé númeru kazu pozitivu aumenta husi loron ba loron.
Entretanu, iha loron 24 fulan-abril 2021 ne'e, Sentru Integradu Jestaun Krize (SIJK) fó-sai katak kazu ativu hamutuk 956, no iha Munisípiu Díli rejista kazu detetadu hamutuk 1542 signifika maioria kazu pozitivu la detetadu.
Tuir kalkulasaun husi SIJK katak sé aplika 7,3 % ba populasaun Díli, signifika atualmente iha maizumenus ema hamutuk rihun 20 mak infetadu ona ho virus SAR-CoV-2 iha munisípiu Díli.
Tanba ne'e, implementasaun estadu emerjésia nu’udar medida prevensaun no kontrolu ne’ebé di’ak liu atu hases sidadaun hothotu iha TL husi moras coronavirus.
Nune’e, bele proteje saúde públika ema hothotu ninian hodi evita kalamidade públika ne’ebé bele mosu husi virus corona.
Hafoin Timor-Leste rejista kazu pozitivu COVID-19 na’in-1, iha 23 fulan-marsu tinan 2020, Konsellu Ministru aprova pedidu ida atu husu Prezidente Repúblika deklara estadu emerjénsia, iha loron 27 fulan-marsu 2020, Prezidente Repúblika deklara estadu emerjénsia ba periodu loron-30.
"Dezde fulan-marsu 2020, Estadu Timor-Leste deklara ona estadu emerjénsia ba dala sanulu-resin-rua", dehan.
Ho nune'e, Prezidente Repúblika sei uza nia poder konstitusionál tuir artigu 85, alínea g, konvoka membru sira seluk husi órgaun konsultivu-Konsellu Superior Defeza no Seguransa no Konsellu Estadu atu rona ida-idak ninia hanoin kona-ba pedidu deklarasaun estadu emerjénsia husi Governu.(*)
