Embaixadór Xina nian mai Timor-Leste, Xiao Jianguo governu Xina konkorda atu fó 100.000 doses vasina Sinovac Covid-19 ba governu Timor-Leste hodi kombate Covid-19.

Konkordansia ba asuntu ne'e, hafoin audénsia ho Primeiru Ministru, Taur Matan Ruak iha palásiu governu, kinta (22/04), ne'ebé ko’alia kona-ba progresu ikus iha kooperasaun vasina entre nasaun rua ne'e.

Embaixadór Xiao informa, Xina no Timor-Leste nu’udar amigu di’ak iha tempu naruk. Xina konsidera Timor-Leste hanesan viziñu di’ak, amigu no parseiru di’ak, sempre fó apoiu ba prosessu luta ba independensia, konstrusaun nasionál nomós ba dezenvolvimentu.

Informasaun ne’e, marka importansia progresu ida iha kooperasaun bilateral no espera donasaun ida ne'e bele haforsa abilidade Timoroan nian iha kombate Covid-19, no fasilita rekuperasaun lalais iha ekonómia no inundasaun.

Dezde surtu ba Covid-19, Timor-Leste no Xina hamriik hamutuk no apoia malu mutuamente. Xina nu’udar País ne’ebé hatutan liman hodi haruka aviaun fretada/charter mai Timor-Leste iha prosesu ba kombate pandemia ne’e.

"Bazeia ba pedidu husi parte Timor nian, Governu Xina konkorda bazeia ba pedidu husi Governu Timor – Leste atu haruka 100,000 doses vasina Sinovac ba Covid-19 mai Governu Timor-Leste”, afirma komunikadu impresnsa ne'ebé www.tempotimor.com asesu, kinta (22/04).

Prezidente Xinês, Xi Jinping hatete, iha tempu ida Xina sei onra nia kompromissu atu halo vasina ba di’ak públiku global nian.

Xina firmemente fiar ba produsaun vasina ba Covid-19 ba di’ak públiku nian no Xina halo servisu seriamente hodi hadiak asessibilidade ba nasaun ne’ebé sei dezenvolve, inklui Timor-Leste.

Nune'e, Xefe governu, Taur Matan Ruak agradese liuhusi Embaixadór Xina ba apoiu sira husi povu no Governu Xina nian durante ne’e, liuliu iha períodu pandemia ne’e, ne’ebé bele ajuda tebes Governu Timor-Leste iha luta kontra surtu ne’e. (*)