Deputadu Bankada KHUNTO Luis Roberto hateten, implementasaun Cesta Bázika to'o iha suku, povu sempre krítika tanba sasán balun la tuir presu, nomos piór liu maka hahaan ne'e laiha kualidade. Nia husu ba governu tenke toma medida nune'e iha futuru kompañia sira-ne'ebé governu fó fiar atu distribui cesta bázika ne'e labele repete tán irregularidade.

“Problema hahaan ne'ebé fahe ba populasaun sira la tuir nia presu no aat liu maka hahaan laiha kualidade, ne'ebe ha’u husu governu atu hadi’a jestaun ida-ne'e,” nia levanta iha plenária Parlamentu Nasionál, tersa (5/1).

Iha fatin hanesan, deputadu Bankada Fretilin, David Dias Ximenes husu ba governu atu toma medida ba implementasaun programa cesta bázika ne’e, liuliu oinsá mak distribui ai-haan ne'ebé ho kualidade ba povu nia saúde.

Nune'e mos deputada bankada CNRT, Verginha Ana Belo mós fo hanoin ba governu tenke toma atensaun atu nune'e labele sakrífika povu, tanba programa cesta bázika ne'e la'ós povu sira mak husu hahaan ba governu, tanba ne'e se governu hakarak fó, tenke fó ho didi’ak.

“Ha’u haree ho objetividade duni ba saida mak akontese iha distribuisaun cesta bázika ne’e tanba durante ne'e ami kestiona, no ita hotu inklui populasaun sira mós kestiona, tanba la ba ajuda sira, talves bele ajuda sira tanba ita fó buat ruma ba sira, maibé kualidade ba sasán distribuisun sira-ne’ebé iha, liuliu hahaan sira-ne'e barak tebes la prienxe kritériu atu-bele fó saúde di’ak ba povu,” dehan nia.

Hatán ba kestaun ne'e, Ministru Asuntu Parlamentár no Komunikasaun Sosiál, Francisco Jerónimo, sei hato’o preokupasaun ne’e ba ministériu kompetente nune’e fó alarma ba kompañia sira atu labele repete aktu ida-ne'e. (*)