Ministru Prezidensia Konsellu Ministru Fidelis Leite Magalhaes informa, haree ba evolusaun husi situasaun epidemiolojika no proliferasaun ba kazu rejistadu sira husi kontajiu Covid-19 iha nivel rejional no iha nivel mundial atu evita no neutraliza risku sira husi propagasaun SARS-CoV-2, nune'e proteje saude publika no iha kbit atu hatan ba sistema nasional saude nian mak husu atu estende tan Estadu Emerjensia.
Nia dehan, governu propoin ba Prezidente Republika atu renova Estadu Emerjensia, tanba permite atu suspende ka limita direitu kona-ba sirkulasaun internasional, husi sirkulasaun no fiksasaun rezidensia no rezistensia nian.
"Ohin governu delibera katak, governu sei husu fali estensaun Estadu Emerjensia husi Prezidente Republika, ne'ebe karta pedidu ne'e ohin PM (Primeiru Ministru) asina tiha haruka ba Prezidente Republika no sei halo tuir medida dalan konstituisaun nian ba konvokatoriu sira ne'ebe nesesariu no nufin semana oin sei ba iha Parlamentu, governu sei ba hatan, sei iha deklarasaun Estadu Emerjensia hodi troka fali Estadu Emerjensia ne'ebe iha hela agora", Fidelis hateten lia hirak ne’e hafoin reuniaun Konsellu Ministru iha palasiu Governu, Segunda (21/12).
Tuir nia, maske iha ona informasaun pozitivu barak katak, iha ona ai-moruk vasina, seidauk to'o mai Timor-Leste.
"Maske iha ona notisia pozitivu barak kona-ba vasina rua ou tolu iha mundu oras ne'e iha ona, maibe seidauk to'o mai, eh alende ida ne'e mos numeru moras mos aumenta nafatin iha pais vizinu sira, Indonezia kontinua aumenta, Australia mos iha aumenta tan", nia akresenta.
Tanba ne'e, importante tebes mai Timor-Leste atu kontinua proteze ninia sidadaun sira nia moris atu halo foun hikas Estadu Emerjensia.
"Ne'ebe pedidu ne'e ohin aprovadu tiha ona, depois governu rasik sei ba iha Parlamentu hodi hatan kona-ba pedidu ida ne'e", nia afirma. (*)