Tuir observasaun www.tempotimor.com nota katak, kuaze kritika entre deputadu bankada opozisaun ho governu mosu durante plenária ohin iha Parlamentu Nasional, Tersa (15/12).

Xefi bankada CNRT Duarte Nunes hateten, Parlamentu Nasional hanesan fatin atu halo politika, no durante CNRT halo knaar nu'udar reprezentante povu iha uma fukun aprende barak husi deputadu senior sira ne'ebé iha primeiru lejislatura kuaze mai husi diaspora hanesan Mosambique, Portugal no Austrália.

Duarte mos akresenta katak, bainhira deputadu balun mak la sastifas ho aktu politika hala’o iha PN, Duarte husu atu ba uma toba de’it.

"Iha uma fukun ida ne'e mak fatin ba ita atu halo politika, saida deit mak ita halo ne'e politika, se kolega ruma mak lakohi halo politika diak liu ba uma, fase ain sae kama toba," dehan Duarte iha PN Dili, Tersa (15/12).

Deputadu bankada Fretilin Antoninho Bianco enkoraza bankada CNRT atu halo politika hateke ba oin no labele atu repete bebeik sala nune'e labele sai bebeik tan.

"Se Prezidenti bankada CNRT dehan politika hateke ba oin, sim los, hateke ho buat los. Ita labele tama ho buat ne'ebé sala beibeik, tenki rekoñese ita nia erru no labele tama iha erru beibeik iha buat ne'ebé hanesan," Branco hateten.

Antes ne'e, Deputadu bankada KHUNTO Olinda Guterres soe piadas bem-vindo ba deputadu CNRT ne'ebé durante debate Orsamentu Jerál Estadu (OJE) loron sanulu deside la partisipa diskusaun no aprovasaun OJE 2021.(*)