Iha Segunda (12/10), SEPS serbisu hamutuk ho parseiru sira realiza mini kampaña hodi fó hanoin ba komunidade sira atu labele soe foer arbiru.

Diretór Jerál Protesaun Sivíl, Superentendente Polísia Ismael da Costa Babo hatete, liu husi mini kampaña ne’e fó avizu ba komunidade sira hodi soe foer iha nia fatin.

"Fó informasaun ba komunidade sira, tanba udan atu mai ona, depois lixu mós barak soe arbiru, entaun udan bele hamosu dezastre naturais," dehan Ismael iha Ponte Habibie, Bidau, Segunda (12/10).

Tuir nia, SEPS iha dever ida atu fó hatene komunidade kona-ba perigu husi foer ne’ebé soe namkari de’it.

"Dever morál SEPS nian atu sensibiliza ba komunidade sira atu reduz lixu iha sidade Dili no hadook aan husi fatin ne'ebé mak fasíl mosu dezastre naturais, rai monu, labarik labele besik valeta sira iha tempu udan, tanba vítima barak mak bee lori ona," katak nia.

Iha fatin hanesan, Jestor ba Programa Care Internasionál, Delfina de Jesus hatete, kampaña ne'e atu avizu ba komunidade sira oinsa sira bele hatene katak tempu udan bele mosu indunsaun bainhira la tau foer iha nia fatin ka soe arbiru.

"Oinsa reduz risku ba sira-nia aan, entaun tenke soe lixu iha nia fatin, liu-liu haree ba plastiku sira ne'ebé namkari iha Dili laran no mós iha tasi-ibun sira," katak nia.

Entretantu, mini kampaña ne'e nia rute hahú husi Largo Lecidere to'o Tasi Tolu no fila husi Tasi Tolu ba Bekora, hafoin remata iha Ponte Habibie.