Tuir Abel aseita ho desizaun guvernu hodi autoriza Timor Gap partisipa iha fornesementu kombustivel mina ba EDTL, tanba hanesan dalan ida atu Timor Gap iha esperensia hodi servisu diak liu tan inklui redus indereitamente despeja estadu.
"Konkorda, tanba Timor Gap harii atu hatama reseita ba Estadu," dehan Abel ba www.tempotimor.com, iha Parlamentu Nasionál Dili, Segunda (28/9).
Deputadu PLP ne'e salienta, Timor Gap presiza tenke perparasaun ne'ebé di'ak liutan no la'ós buat bo'ot ida, Timor gap hanesan kompaña estatal ne'ebé estadu investa osan barak ona tanba ne'e presija iha duni interese atu perpara kondisaun.
"Hau hanoin sira iha kapasidade atu sira prienxe kriteria sira ne'e iha tempu badak nian laran, tanba kriteria ladun barak, se agora sira seidauk iha, ho kontratu ida ne'e obriga sira atu perpara kondisaun ne'ebé diak liu tan, ne'e laos buat bo'ot," tenik Abel
Entretantu tuir pagina ANPM ne'ebé www.tempotimor.com asesu, kriteria importante ne'ebé presiza prense husi kompañia sira atu fornese mina iha area Downstream importante liu mak minimu iha stroge katak fatin armajen hodi rai mina.
Antes ne'e, soru-mutu entre Primeiru Ministru, Taur Matan Ruak ho Ministru Petróleo no Minerais, Victor da Conceição Soares inklui ministru obras publika, Salvador deside atu Timor gap hanesan kompana estatal sei hola parte mos iha distribusaun kombustivel mina ba EDTL ho total tokon 35 litru ba slot ida husi totál slot tolu iha Sentrál eletrisidade hanesan Hera, Betano ho Sakato Oecusse.
Maski nune'e, Governu sei enkamina dekretu lei ba Prezidente Repúblika, Francisco Guterres Lú Olo atu promulga, nune'e Timor Gap nia partisipasaun formaliza. (*)