Agora daudaun Ângela tarjetu fali Sekretáriu Jerál Partidu FRETILIN, Mari Alkatiri tanba konsidera halo manobra polítika perturba povu no Estadu.

Nia alega, krime ne'ebe Alkatiri komete hodi viola Konstituisaun RDTL tanba livrremente pratika manobra politika hodi perturba povu tomak nia moris,inklui Governu no nasaun.

TuirÂngela, hahalok ne'ebe Mari Alkatiri pratika maka influénsia Presidente Republika, Fransisco Guterres Lu Olo hodi hamosu inserteza iha vida ekonomia nasional, dezenvolvimento Nasional, governasaun, iha Parlamentu Nasionál no seluk tan.

Nia afirma, atu ida tan, maka Alkatiri halo planu atu estraga osan Estadu relasiona ho estudu foun ba Fronteira Maritima ne'ebe tuir planu atu dada kadoras ba fali Australia.

Nia hatutan akuza, atu seluk maka rezultadu inspesaun ne'ebé halo husi Mari Alkatiri kona-ba osan tokon US$ 700 ne'ebé durante tinan haat (4) nia-laran nu'udar presidente RAEOA uza halo konstrusaun ZEESM, maibe konstrusaun ne'e la finaliza no osan Estadu ne'e tau iha konta bankaria privadu.

Tuir nia, konstrusaun Aeroportu Internasionál RAEOA ho montante osan tokon US$ 100, konstrusaun la ramata, laiha lisensa, dezeñu  ho BoQ laiha analiza tanba nee konstrusaun fisiku Aeroportu diferente ho dezeñu no BoQ.

"Tanba ne'e tenke kaptura no halo investigasaun klean hasoru eis Presidente ZEESM--RAEOA Mari Alkatiri tuir lei haruka," dehan nia, iha Bairo Grilos, Kinta (24/9).

Nia mos husu orgaun kompetente PNTL, PSIK, KAK lalais halo investigasaun profunda hasoru Alkatiri konaba sosa Ró Haksolok ne'ebé selu lunas 100%, maibe ate ohin loron ró ne'e laiha.

Ironia tebes, dala barak ona, Ângela Freitas portavos grupu Rezisténsia Nasionál Defende Justisa no Konstituisaun (RNDJK) halo akuzasaun barbarak hasoru politikus sira no Prezidente da Republika maibe parte kompetente la halo atu ruma. (*)