“Uluk iha 2006, Alfredo mós la'o iha ne'e, agora Alfredo iha ne'ebé?. ema oho Alfredo, tanba sá?. Ema oho Alfredo tanba Alfredo mak hahú atu bonkar, ne'e mak realidade”, deklara Alkatiri bainhira partisipa kampaña segundu volta kandidatu Francisco Guterres ‘Lú Olo’ ba loron daruak iha Suai-Covalima, domingu (03/04).
Ho realidade ida ne'e, mak Alkatiri hakarak fó hanoin, bainhira ema gosta de'it uza ema seluk, no la uza nia ema ne'e, perigozu.
Alkatiri fó ezemplu, hanesan kandidatu Lú Olo, iha nia baze politika sosiál mak hahú votu ho rihun-213 ne'ebé mak husi partidu FRETILIN no aumenta tán ho plataforma partidu tolu mak nia votu sei sa'e rihun-300 liu.
Tanba ne'e kandidatu sé de'it iha Timór hakarak sai Prezidente tenke iha baze polítika sosiál ba apoiu, atu nune'e nia rasik bele foti desizaun no la tauk ba nia xefe ruma ke maihusi liur.
Maibé ba kandidatu ne'ebe agora atu sai Prezidente Repúblika laiha baze polítiku sosial ruma ba apoiu ne'e siknifika, nia tabele de'it ba ema ida, no ka'er de'it saku husi ema seluk mak tabele tuir.
“Uluk 2006 iha grupu ida mak sai vítima, ita bolu dehan petisionáriu, sira sai vítimaz sira laiha kulpa. Tanba ne'e Governu ida ne'e hamutuk ho Prezidente Lú Olo sei reabilita sira sei sai sidadaun ho dignidade tomak, siknifika sei fó ba sira formasaun treinu atu halo atividade tuir sira-nia hakarak, seguransa ka buat ruma”, hatete nia. (*)