Tuir nia, ezijensia estudante AUTL nian ne'ebé dehan MESSK halo diskriminasaun ba estudante iha rai-li'ur no rai-laran ne'e la koerénsia tanba la tuir dekretu Lei Númeru 20/2020.
"Sira nia ezijensia iha neeba preve atu husu esesaun propinas ba semester pár nian ne'ebé husi fulan-Juñu mai to'o iha Dezembru maibé, ita haree sira mos mensiona dekretu Lei Númeru 20/2020 ne'ebé atu sustenta timoroan tomak iha rai-li'ur temporariamente, liuliu ba kustu vida", dehan nia, hafoin retiru membru governu sira, iha edifísiu Ministériu Finansas Aitarak-Laran, Segunda (03/08).
Tanba ne'e, estudante sira iha rai-laran kestiona katak, subsidiu ne'e injustisa, diskriminasaun no ezijensia ba esensaun propinas ba semester pár iha fulan oin mai.
"Maibé, atu hatete de'it katak, ezijensia ne'e la koerensia ho dekretu Lei Numeru 20/2020 ne'ebé sira mensiona", dehan nia.
Longuinhos afirma, dekretu Lei numeru 20/2020 ne'e kompetensia tomak iha Ministériu Negósiu Estranjeiru no Koperasaun (MNEK) atu halo intervensaun ba estudante bolseiru no naun bolseiru iha rai-li'ur atu labele mai Timor-Leste temporaria ligadu ho surtu Covid-19.
"Tanba dekretu Lei numeru 20/2020 ne'e knaar kompeténsia Ministériu Negósiu Estranjeiru no Koperasaun (MNEK) mak sai na'in," tenik nia.
Nia dehan, subsidiu ne'ebé governu halo iha rai laran mak liu-husi $100 kada uma kai'n, subsidiu pulsa eletrisidade no subsidiu ba traballador sira, hirak ne'e maski la direta ba estudante sira, maibé estudante mós benefisiu ona ba intervensaun ne'e.
Tanba ne'e, haree ba razaun sira ne'e laiha koerénsia bainhira estudante rai-laran hato'o argumentu ne'ebé ho dekretu Lei Númeru 20/2020. (*)