Prezidente Administradaun KKLN Vidal de Jesus "Riak Leman" hatete, sira hasoru-malu ho PR Lu Olo hodi hato’o preokupasaun kona-ba edifisiu KKLN ne’ebé to’o ohin seidauk iha.
"Ami nu'udar Konsellu hasoru malu ho Prezidente Repúblika, ami ko'alia kona-ba fatin ne'ebé konsellu hatudu hodi halo serbisu to'o agora ami-nia fatin seidauk iha," dehan Riak Leman iha Palásiu Prezidensiál Bairu-pite Dili, Segunda (22/06).
Riak Leman hatete, PR Lu Olo mós preokupa tanba to’o ohin loron KKLN seidauk iha fatin hodi hala’o serbisu.
"Kona-ba fatin ne'e PR preokupa no sei ko'alia mós ho PM, bainhira formasaun governu hotu ona, ne'e sira bele difine ka determina fatin ida ba Konsellu Kombatente Libertasaun Nasionál," dehan Riak Leman.
Daudauk ne’e, nia hatete, KKLN hala’o serbisu iha edifisiu SERVE.
"Ami hala'o knaar iha SERVE, sala rua de'it, uma ne'e badak ona, AC mós laiha, ita tama ba serbisu minutu ida ita kosar metan sulin, situasaun ida ne'e mak agora KKLN infrenta."
Maske hasoru difikuldade ne’e, maibé Riak Leman dehan, KKLN konsege ona halo serbisu balun hanesan harii ona konsellu iha munisípiu 12, inklui RAEOA.
"Konsellu atinze mak ida ne'e, ami organiza harii Konsellu Munispal iha 12 muníspiu inklui RAEOA, ne'e hotu ona, entretantu Konsegresu Nasionál hodi harii Konsellu Nasionál Libertasaun Nasionál hotu tiha ona, agora ha'u hein mós orsamentu atu governu atu tau orsamentu ruma atu ami bele hala'o atividade," nia dehan.