Ministériu Solidariedade Sosiál Inkluzaun (MSSI) rasik hili ema ida de'it maka kontrola sistema online, nune'e prosesu atu selu komunidade sira mós la'o neineik.
Pagamentu ezekuta ona durante semana ida, maibé iha suku balun seidauk atinji to'o 50%.
Hanesan akontese iha Suku Bebonuk, ne'ebé
prosesu pagamentu hahú kedas iha Tersa (9/6) to'o Sábadu (13/6), maibé foin maka atu remata aldeia ida husi totál aldeia lima.
Xefe Suku Bebonuk, Serafim Machado hateten, prosesu fahe subsídiu kleur komunidade deskonfia fali xefe suku sira, maibé loloos ne'e kleur iha ema ne'ebé responsablidade sistema online mak menus.
"Prosesu pagamentu iha Bebonuk sistema mak halo tarde, tanba ita uza sistema online no funsionáriu ida ne'ebé kaer sistema ne'e mesak de'it, entaun dala ruma prosesu ema ida bele han 15 to'o 20 minutu", dehan nia, iha sede Suku Bebonuk, Sabdu (13/6).
Autoridade suku rasik hakarak prosesu ne'e lalais. Tanba ne'e, husu ba MSSI atu aumenta ekipa ida ka rua mai atu bele ajuda ekipa sira ne'e hodi finaliza lalais prosesu ne'e.
Nune'e tuir planu, pagamentu tenke remata iha loron 10, maibé ezekusaun la tuir espetativa ne'ebé iha. Ne'e duni, presiza aumenta tan ekipa para bele aselera lalais tanba benefisiariu barak maka seidauk simu osan.