Maske durante ne'e mosu dezintendimentu balun entre media ho SIJK, maibé tuir portavoz SIJK Odete Viegas, dezintendimentu ne'e fó forsa atu luta kontra Covid-19.
"Hakarak agradese mós ba imi média sira, tanba imi-nia kontribuisaun mak bele fó mós informasaun ba iha ita-nia públiku no komunidade, maske dala-barak mosu dezentendimentu," dehan Odete iha sala situasaun Sentru Konvensaun Dili, Sábadu (25/04).
Maske nune'e, nia afirma, dezintendimentu ne'ebé mosu haforsa liu tan parte hotu-hotu, liu-liu SIJK no media, hodi luta nafatin kontra Covid-19.
"Maske iha dezentendimentu oioin entre ita, maibé ida ne'e hatudu sinal katak fó biban no forsa nafatin mai ita hodi nafatin luta kontra Covid-19," dehan nia.
Portavoz ne'e garante, iha situasaun saida de'it, SIJK sei nafatin fó sai informasaun ba media sira kada loron hodi hatutan ba públiku.