Maibé, Portavoz AMP foun, Antonio da Conceicão 'Kalohan' dehan, laiha fatin atu aprezenta mosaun sensura ba PM Taur.
"Laiha hanoin no la presiza atu aprezenta mosaun sensura, tanba iha Primeiru Ministru hatama tiha ona ninia surat husu demisaun, entaun halo fali mosaun sensura ba Primeiru Ministru ninia pedidu demisaun rasik ne'e laiha fatin ba koligasaun," dehan Kalohan iha parlamentu nasional, Segunda (06/04).
Deputadu husi bankada PD ne'e dehan, koligasaun foun haree prosesu hirak ne'e la'o tuir dalan konstituisaun, tan ne'e bainhira PM hato'o ona ninia pedidu demisaun ba Prezidente Republika, koligasaun foun la presiza atu halo tan mosaun sensura.
Tan ne'e, nia afirma, AMP entrega desizaun hotu-hotu ba hakotu impase politika iha PR Lu Olo nia liman.