Tempotimor (Dili) - Governu liuhusi Konsellu Ministru (KM) fó podér ba Ministru Administrasaun Estatál (MAE), Abílio José Caetano, atu asina memorandu entendementu entre Korea International Cooperation Agency (KOICA) hodi hadi'a eletrisidade no bee moos iha área remota.
Ministru Reforma Lejizlativu Asuntu Parlamentár (MRLAP), Fidelis Manuel Leite Magalhães hatete, Konsellu Ministru fó ona podér ba MAE atu bele asina memorandu entendementu ho KOICA no Programa Nasoins Unidas ba Deszenvolvimentu (PNUD) no mós Governu Indonézia hodi dezenvolve área remota sira.
"Kooperasaun ne'e atu permite governu bele hadi'a liután asesu ba eletrisidade, bee moos ba ita-nia populasaun sira iha área remota, liuliu iha Munisípiu Baukau, Bobonaru, Dili no Manatutu," dehan nia, iha Palásiu Governu, Kuarta (4/3).
Governante ne'e hakotu, kooperasaun institusionál ne'ebe prevé iha memorandu entendementu atu hadi'a kondisaun populasaun iha área remota. (*)